adminUJACQUELINE Mahlayeye (33) wayezilalele ngemva kokujabulela ilanga leKhisimusi andubana avuswe ngumsindo owawusegumeni lakhe ngehola lesine ekuseni.
Ephuma phandle lwamtshaya lwameqa uvalo ebona umfowabo ekhuluma lendoda enqunu. Phezulu kwalokho okunye okwamethusayo yikuthi indoda le enqunu yambikela ukuba ithunywe ngunina ukuzombulala.
Omakhelwane besiqintini seTshwane besizwa lawo mazwi babizana ukuze bazwisise ngomhlolo lo. Undoda lo wathi ebabikela ukuthi uphaphe ngesibhulatsho (scrubbing brush) ukuze afike labo omakhelwane bonke bahle bathukuthela — babasa umlilo befuna ukutshisa indoda le.
Isimanga kwaba yikuthi uMahlayeye wavimba abantu ukuthi bangabulali umthakathi wakhe.
UMahlayeye uveze ukuthi indoda le yathi imbona yacela uxolo njalo wachaza ukuthi uthunywe ngunina ukuthi azombulala.
Indoda le kubikwa yaveza njalo ukuthi isuka ePankop eMpumalanga.
UMahlayeye uveze njalo ukuthi waphinda watshayela umfundisi wakhe uBishop Zebilion Nkwana ucingo.
Kubikwa undoda lo ngaleso sikhathi waphinda wathi uphapha ngesibhulatsho esimncedisa njalo ukugqekeza ezindlini zabantu.
Lokhu kwaphinda njalo kwathukuthelisa izakhamizi okwenza uBishop Nkwana wayabikela amapholisa ukuthi azolamulela indoda le.
UMahlayeye uveze njalo ukuthi minyaka yonke ngesikhathi seKhisimusi kusukuma uzimu ngakibo kuyaliwa, abanye njalo batshaywe yizinto.
Isikhulumi samapholisa enkambeni yeTemba uConstable Herman Moremi uthe izakhamizi kumele zixekane lomkhuba wokuhlasela abantu abathola bengagqokanga bengazazi izimo zengqondo zabo. — Ubulembu
Online Reporter