admin
Daphne Machiri
VARAPI vechivanhu vari kukurudzirwa kushanda pamwe chete nesangano rinoona nezvekuchengetedzwa kwezviwanikwa, reEnvironmental Management Agency (EMA), nedonzvo rekuchengetedza masango.
Muhurukuro naEnvironmental Officer weEMA anomirira dunhu reHarare, VaGilbert Mugunzva, vanoti zvakakosha kuti vashande nevarapi vechivanhu mukuchengetedza masango sezvo muri imo munowanikwa miti nemamwe makwenzi zvavanoshandisa mukuita mabasa avo.
“Tinochengetedza masango ane miti zvakaita sekuBotanical Gardens uko kunotova neruzhiwa. Zvakakosha kuti tibatane nevarapi vechivanhu kuti vadyare miti toichengetedza nekuti hazvirevi kuti vanofanirwa kuenda kumasango ari kure bedzi kunotsvaga mishonga,” vanodaro.
Mukuru wesangano rinomirira vanachiremba vechivanhu reZimbabwe National Practioner’s Association, Sekuru Friday Chisanyu, vanoti vakazvipira kushanda neEMA mukuchengetedza masango sezvo muri imo mavanowana makwenzi avoshandisa mubasa ravo.
Vanoti vanachiremba vechivanhu vari kunetseka zvikuru kuti vawane mishonga nekuda kwekuparadzwa kuri kuitwa masango kuburikidza nenzira dzakasiyana.
Sekuru Chisanyu vanoti vamwe vari kubva sekuHarare vachienda kuBinga kana kuDande kunotsvaga mishonga.
“Zvinotora mazuva kuti tiwane mishonga nekuda kwekuti nzvimbo dzatave kuenda dzimwe itsva kwatiri uye zvave kutidhurira,” vanodaro.
Mabuya Shorai Mugondachako vanove murapi wechivanhu uye vachizivikanwa nezita rekuti Mbuya Mukwapura, vanotsinhira kuti vave kuwana mishonga yekurapisa kunzvimbo dziri kure.
“Ini ndave kubva muHarare kuenda kure chaizvo sekuChiredzi, kuBirchenough Bridge nekuChipinge asi kare ndaisiwana makwenzi aya pedyo sekuLake Chivero,” vanodaro Mbuya Mukwapura.
Online Reporter