Online Reporter
YiNtatheli kaMthunywa
KULENDODA eleminyaka engu-38 yakoBulawayo emiswe phambi komthethwandaba isetheswa icala lokutshayelela umntwana ongumakhelwane phansi kanengi isithi ngundofa.
Umsolwa uSenzile Nyathi ohlala elokitshini leMabutweni umiswe phambi kukamantshi uMnumzana Jeconia Prince Ncube emthethwandaba weWestern Commonage ebhekene lecala lokuzama ukubulala.
Uzabuye aphenduke emthethwandaba mhlaka 8 Zibandlela evela entolongweni.
Kubikwa ngosuku lweKhisimusi citshe ngemva kwehola lika-10 ebusuku umamangala, ongumntwana wathi edlala phandle duzane langakibo, uNyathi owayedakiwe wamlanda wasememeza esithi, “Nangu undofa.”
“Ngemva kokuklabalala esithi nangu undofa, walanda umntwana lo wafika wamphakamisa wamtshayelela phansi kathathu,” kutsho umbiko womthethwandaba.
Umntwana walimala ekhanda wagijinyiselwa esibhedlela ukuze athole usizo.
Amapholisa abikelwa ngesehlakalo lesi uNyathi wabotshwa.
Kusenjalo, kulendoda eleminyaka engu-19 yeTsholotsho layo emiswe emthethwandaba isetheswa icala lokugwaza umakhelwane wayo kathathu ngengqamu ngosuku lweKhisimusi.
UMengezi Ookeditse Masuku kazange abuzwe lutho ngesikhathi ephambi komthethwandaba okwesikhatshana njalo uzabuye aphenduke mhlaka 9 Zibandlela.
Kubikwa ngehola lika-9PM, eduze lesikolo seZulukandaba Primary School, eNtumbane, uMasuku waba lengxabano lomamangala uMnumzana Brighton Dahwa (25), ngesizatho esingaziwayo.
Baqhubeka bexabana okwabangela ukuthi uMasuku acine ekhipha ingqamu wagwaza uDahwa kathathu emhlane.
UMnu Dahwa wagijinyiselwa esibhedlela ukuze elatshwe, kwavulwa lecala okwabangela ukuthi uMasuku abotshwe.
