Online Reporter
Ethel Ncube
INHLANGANISO ye-Livestock Production Development isixwayise abalimi abagcina inkomo zochago ukuthi bananzelele uchago lungonakali ngesikhathi sokutshisa.
UMnumzana Cosmas Muzunde ongu–Dairy Officer esabelweni se-Matabeleland North uxwayise abalimi abafuya inkomo zochago ukuthi bananzelele uchago lungavuthwa kodwa luhlale lu-fresh.
Uthe okokuqala umlimi kumele akhangele indawo azasengela khona ukuthi ihlanzekile, akhangele lempahla azayisebenzi ukuthi ihlanzekile njalo abone ukuthi inkomo azazisenga zisendaweni ehlanzekelieyo futhi lokuthi azilamikhuhlane.
“Sikhuthaza abalimi abagcina inkomo zochago ukuthi beqale bekhangele indawo abazasengela khona ukuthi iyenela yini inkomo zabo lokuthi ihlanzekile, ubulongwe bukhitshwe kwageziswa. Imiduli yendawo abazasengela kuyo kumele ipendwe.
“Ekusengeni uchago kumele kusetshenziswe izitsha ezihlanzekileyo futhi umlimi abone ukuthi inkomo yakhe kayilamkhuhlane njalo kayiguli. Inkomo zochago kuyenzeka ukuthi zihlaselwe ngumkhuhlane we-mastitis,” kutsho uMnu Muzunde.
Sixwayisa abalimi ukuthi bengasengi inkomo ezile-mastitis ngoba uchago lwazo luyabe selulomkhuhlane.
Uqhubekele phambili esithi ukhuthaza abalimi ukuthi bengasengi inkomo ezilemikhuhlane ngoba uchago lwakhona luyabe selungolile.
Uthe abalimi bangasenga uchago bengalugcini ngekhaya, beluhambise kuma-processor. Uthe umlimi nxa ehlala khatshana lalapho okule-processor angalugcina okwelanga elilodwa, njalo uchago kumele luhlale lapho okulomumo ongaphansi kwe 7 degrees.
“Umlimi nxa ehlala khatshana sikhuthaza ukuthi angalugcina okwelanga elilodwa evuke eluhambisa ku-processor.
“Uchago kumele lugcinwe endaweni engaphansi kwe 7 degrees ukuze lungavuthwa, ngoba lungahlala lapho okutshisa khona luyavuthwa futhi luyabe lungasavumi ukuya ku-milk processor,” kuphetha uMnu Muzunde.
