Online Reporter
Bhekimpilo Tshalibe
IMVUNDLA yizifuyo ezincane eziphangisa ukukhula futhi ezilakho ukugcwala isibaya ngesikhathi esifitshane nxa zinikwa ukudla okuqondileyo.
UMnumzana Edmore Chikowa ongu-Livestock Officer koBulawayo ukhuthaze abalimi abafuye imvundla ngokudla okumele bakunike imvundla ukuze ikhule kuhle.
Uthe imvundla ayidli yonke into kodwa ilokudla okumele ikuphiwe.
“Imvundla kayihluphi ukufuya njalo sikhuthaza abalimi ukuthi beyinike utshani obomileyo kanye lezilimo ezigoqela inyawuthi, amabhanana, indlubu, amakhasi endumba, imbhida, amabele kanye le-comfrey.
“Sikhuthaza abalimi ukuthi benike imvundla yabo amanzi ahlanzekileyo,” kutsho uMnu Chikowa.
Uqhubekele phambili wathi okunye ukudla okuphiwa imvundla yimfucuza zemkambo ngakho-ke ukhuthaza abalimi ukuthi badingele imvundla yabo ukudla lokhu.
“Sikhuthaza abalimi ukuthi bananzelele ukudla abakuphathela imvundla yabo ukuthi akulazibungwana okungazigulisa. Nxa beyipha lokho kudla bangakufaki phansi ngoba kuyaphangisa ukungcola ngoba imvundla ingazwani lokudla okungcolileyo,” kutsho uMnu Chikowa.
Uthe ukhuthaza abalimi ukuthi benike imvundla yabo ama-concentrate.
“Sikhuthaza abalimi ukuthi benike imvundla yabo ama-concentrates loba engamelanga adlulise amalawulo ngoba elakho ukuyenza inone okwedlulisileyo,” kutsho uMnu Chikowa.
Uthe kulokunye okuthile okungamelanga kubekhona ekudleni kwemvundla ngoba kungaba yitshefu kumpilakahle yayo.
“Sikhuthaza abalimi ukuthi benganiki imvundla ukudla okule-castor oil plant, amahlamvu e-cassava, amahlamvu amatamatisi lamagwili,” kuphetha uMnu Chikowa.
