Online Reporter
Tendai Gukutikwa
MUDZIMAI wekuHonde Valley akamhan’arira murume wake, uyo ane barika, kudare raMambo Mutasa achiti ari kumunyima bonde kwemakore 11 adarika uye ari kungosanana nemukadzi wake mudiki.
Febby Chikomba akapotera kudare iri mushure mekudzingwa pamusha nemurume wake, Winston Chimbunde.
Vaviri ava vatova vanhu vakwegura.
“Takapedzisira kupinda munyaya dzepabonde mugore ra2014. Kwemakore ese aya, akanga asingandipe rudo achinditora semunhu asitoripo zvachose,” anodaro Chikomba achiudza dare.
Anoti akaroorwa naChimbunde mugore ra1994, asi rudo pakati pavo rwakatanga kunetsa muna 2003 apo akaroora mudzimai wechipiri.
“Mushure mekunge aroora mumwe mukadzi, akatanga kundishungurudza,” anodaro.
Chikomba anoti pavakazosvika gore ra2014, vakanga vatoregera kuita zvepabonde.
“Kubva ipapo, anongofunga nezvemudzimai wake mutsva,” anodaro.
Chikomba anoenderera mberi achiti:
“Akabva azondidzinga pamusha achibva anogara kumba kwangu nemudzimai wake mutsva saka kutaura kudai handichina pekugara.”
Anoti akashanda nesimba kwemakore akawanda achirima mabhanana achitengesa uye achishandisa mari yacho kutenga masitendi akawanda ekugara.
Zvisinei, anoti murume wake akatengesa zvimwe zvezvivakwa izvi iyi asingazive.
“Ndairima mabhanana angu, ivo voshandisa mari yangu iyi pamwechete nemukadzi mutsva uyu,” anodaro.
Chikomba anoti kunetsana muwanano yavo kwakawedzera zvekuti murume wake akasvika pakuramba kudya chikafu chaainge abika uye ndokuzobvisa midziyo yake yese mumba make.
“Amai vangu vakashaya, asi Chimbunde haana kuuya pakuvigwa kwavo kana kuenda kunobata maoko. Haadye chikafu chandinenge ndabika uye akatora mbatya dzake dzose dzaaipfeka dzaive kumba kwangu,” anodaro.
Chikomba anoti baba vake nevanin’ina vake vakazotaura naChimbunde kuti vanzwisise kuti sei akanga asisaite semukuwasha, asi akabva akavapa dhora sechiratidzo chegupuro.
“Akavapa dhora sechiratidzo chekurambana kwangu naye,” anodaro Chikomba.
Zvisinei nekuparara kwewanano yavo, Chikomba anoti achiri nerudo nemurume wake.
“Ndinomuda asi handifungi kuti achiri kundida, dai aindida angadai asina kundipa gupuro rekurambana,” anodaro.
Anoti akamboenda kudare raMagistrates’ Court achida kubatsirwa panyaya yekugovewa kwemidziyo yakavakashanda pamwechete munguva yewanano, asi nyaya iyi haina kuzoenderera mberi.
“Kudare iri akavaudza kuti achiri kundida uye pakanga pasina chikonzero chekugovana midziyo,” anodaro.
Anopomerawo murume wake mhosva yekutengesa zvidhinha 15 000 izvo anoti akanya ega pasina mvumo yake.
“Akatengesa zvidhinha zvangu ndisingazivi,” anodaro.
Achipawo divi rake, Chimbunde anoramba kuti akasiya mudzimai wake uye anoti achiri kumuda.
“Ndichiri kumuda mudzimai wangu,” anodaro.
Anoti kunetsana muwanano yavo kwakawedzera mushure mekunge Chikomba asangana nedambudziko rechirwere chepfungwa mugore ra2019.
“Paakamboita dambudziko rechirwere chepfungwa, ndakamudzosera kumba kwababa vake, vakandibvunza kuti ndakanga ndauya kuzomusiya here asi ndakavaudza kuti ndaida kuti atange apora,” anodaro Chimbunde.
Anoenderera mberi achiti: “Takatanga kufamba tichienda kun’anga, asi haana kumbowana rubatsiro.”
Chimbunde anorambawo mashoko ekuti akatora pfuma yemudzimai wake mukuru ndokuidya nanyachide.
“Ndichiri naye, zvinhu zvake zvese nemidziyo yake zvichiri kumba,” anodaro.
Zvisinei, anobvuma kuti akatengesa zvidhinha achiti zvainge zvakanywa nemadzimai ake ose ari maviri.
“Hongu, zvidhinha izvi ndakazvitengesa nekuti madzimai angu ese ari maviri aibatsirana pakuzvikanya. Ndakazvitengesa nekuti ndaiziva kuti nguva yavanenge vava kuda zvidhinha izvi ndinovagadzirira,” anodaro.
Mwanasikana wavo, Joyleen Chimbunde, akataurawo mudare ndokupomera baba vake mhosva yekushungurudza amai vake.
Anoti baba vake vanogara vachivashungurudza vachiramba kuvapa mari inenge yawanikwa nenzira dzakadai semaricho ekurimira vamwe vanhu kana mamwe mabasa avanenge vashanda.
Mambo Mutasa vakakurudzira Chimbunde nemudzimai wake kuti vatsvage nzira dzekugadzirisa kusanzwisisana kwavo murunyararo.
Vakayeuchidzawo Chimbunde kuti azive mabasa aanofanira kuita semurume ari muwanano.
“Unonzwa sei hanzvadzi yako kana mwanasikana akauya kwauri achinyunyuta kuti ari kubatwa sezvauri kuita mukadzi uyu?
“Itirai vamwe zvamunoda kuti vakuitirei,” vanodaro Mambo Mutasa.
Vanoti dare ravo rine chinangwa chekusimbisa mhuri kwete kudziparadzanisa.
“Isu hatisi kuuya kuzoputsa wanano,” vanodaro.
Mambo Mutasa vakayambirawo Chimbunde kuti kana aine barika anofanirwa kuda madzimai ake zvakaenzana.
“Kana mune barika itirai madzimai enyu ose zvakaenzana, haungagari mumba make uine mukadzi wechipiri asi iwe wakadzinga mukadzi uyu,” vanodaro.
Vanoti Chikomba anofanirwa kudzokera kumba kwake.
“Ngaadzokere kumba kwake, kana zvichireva kuti uchadzikira mukadzi wako wechipiri tende, ita saizvozvo, asi mukadzi wekutanga uyu ngaave nerugare pamba pake,” vanodaro.
Mambo Mutasa vanotiwo Chimbunde anofanirwa kudzosere mari yaakawana mukutengesa zvidhinha kuna Chikomba.
“Iye achakudzoserai mari yezvidhinha,” vanodaro.
Vakapedzisira nekukurudzira vaviri ava kuti vagare murunyararo uye vagadzirise kusawirirana kwavo kuitira mhuri yavo.
