Online Reporter
YiNtatheli kaMthunywa
INDODA engumlimi ehlala eSuri Suri eChegutu ithi yakufunda ukuthi ukudala icala akubhadali nanko phela yake yangena ejele isetheswa umlandu wokubulala ngokutshisela umuntu endlini ngenxa yemali engange-US$30.
Indoda le, uPeter Jacob (49), wabulala umlungu wesifazane ayemsebenzela ngokumtshisela endlini eMarondera ngomnyaka ka1998 ngemva kokuba ephuze ukunikezwa iholo lakhe.
Wakhuluma amazwi la eseHarare Central Prison emhlanganweni obuhlelwe yiZimbabwe Prisons and Correctional lenhlanganiso ephathisa abake baba sejele i-Desistance Champions kumaviki asanda kwedlula.
“Ngangisebenza epulazini lePondoroza eMarondera eMashonaland East ngithola US$30 ngenyanga, epulazini likaJanet Jackson. Kwangizwisa ubuhlungu ukuthi ngaphuza ukuthola imali ngasenginakana ukumzwisa laye ubuhlungu ngokumtshisela endlini yakhe eyayifulelwe ngotshani,” kutsho uJacob.
Uthe ngalolosuku wayeke wabona umlungu lo ephuma endlini yakhe elubhekise eHarare, wafikelwa ngumcabango wokutshisa indlu yakhe.
Uthi injongo yakhe kwakuyikutshisa indlu kuphela hatshi ukumbulala njengalokhu okwacina kusenzakala.
“Ebusuku ngabuyela endlini yakhe ngingazi ukuthi usephendukile. Indlu yatsha kwasala umlotha, umlungu wahle wafela phakathi.
Ngabotshwa ngasengigwetshwa ngomnyaka ka 1999. Ngaphiwa isigwebo sokufa,” utshonjalo.
Uthe wahlala ejele elindele ukuthi isigwebo sakhe senziwe kwacina sokuthiwa sesiguqulwe saba ngudilikajele (life imprisonment).
“Iminyaka yonke le ngangihlezi ngilindele ukubulawa kwaze kwathiwa sesiguquliwe isigwebo, sengiyapikela udilikajele. Ngacina sengiphuma ejele ngomnyaka ka2020 ngaphansi kohlelo lwePresidential Amnesty.
“Ngiyazisola kakhulu ngalokhu engakwenzayo njalo ngithanda ukuxolisa kakhulu kumuli kamuyi. Ngakubona ukuthi ukudala icala akubhadali sengithola umkami lomntwana sebahamba kudala,” utsho njalo.
Uthe wathi ephuma ejele wathola amasimu lapho alima khona.
“Ngenelisa ukuthola omunye umfazi lo esengilabantwana ababili laye,” utsho njalo.
UMnumzana Trevor Kunaka ongumgcinisihlalo wenhlanganiso yeDesistance Champions uthe balenhlelo ezitshiyeneyo zokusiza abavela ejele ukuthi bathole ukuziphilisa ngendlela ezitshiyeneyo ngenhloso yokuthi bathole ukuziphilisa.
