Online Reporter
Fungai Muderere
UKAPUTENI weChicken Inn uXolani Ndlovu uthi bazavimba kuze kuyevalwa mhla bedibana leHighlanders kumdlalo wokucina kuligi yeCastle Lager kulisizini.
Umdlalo lo uzabe usenkundleni yeBarbourfields ngeSonto.
Amaqembu womabili angena kulumdlalo elemiklomelo engu-38, kodwa iHighlanders iphezulu ngenxa yenani lamabhola esiwahlohlile.
“Lo ngumdlalo omkhulu. Okumele sikwenze yikuthi sihlale emuva, sitshove ibhola phambili. Ngeke sivume ukuhlohlwa,” kutsho uNdlovu.
“Lo ngumdlalo okumele siwunqobe. Sigqiba isizini engazange isijabulise ngoba kasizange sidlale kuhle. Lelo liqiniso.”
Zombili zikhangelane lokuqunywa lizembe, okuyikho okuzakwenza umdlalo uhlabuse.
Kweminye imidlalo ezadonsa amehlo abalandeli, iDynamos idlala leFC Platinum eHarare.
Kungenwa kumidlalo yokucina le sekusaziwa ukuthi intshantshu yiScottland FC, ekhangelelwe ukuphiwa inkezo ngoMgqibelo ngemva komdlalo leTelOne.
Kusenjalo, intatheli zomdlalo wenguqu zizakhetha abadlali abenze kuhle kulisizini, abazangena kukhalenda yeCastle Lager. Abadlali abahamba phambili kusicoco esikhulu seSoccer Star of the Year nguKelvin Moyo loTymon Machope abeScottland.
Umdlali weDynamos u-Emmanuel Jalai laye ubalelwa kwabathathu abazakhokhela abanye kunye loWashington Navaya oweTelOne okhangelelwe ukuthola isicoco seGolden Boot. UNavaya usehlohle amabhola angu-17.
Umdlali lo, oleminyaka engu-28 yokuzalwa, usebizwe kuqembu lesizwe amaWarriors.
Abanye abangangena kukhalenda nguNelson Chadya (Scottland) lo-Andrew Mbeba (Highlanders).
Owathola isicoco esikhulu ngo2024, uWalter Musona kazange adlale kuhle kuqembu leScottland.
