Online Reporter
Fungai Muderere
UYISE womuyi owayedlalela iHighlanders, uCleopas “Dilo Dilo” Dlodlo, uStanley uthe ulokhe esebuhlungwini ngendlela indodana yakhe eyabulawa ngayo.
UStanley uveze lokhu ngemva komsebenzi wokucentwa kwamathuna alabo abake badlalela iBosso abagoqela uCleopas loNkululeko Chunky Dlodlo. Umsebenzi lo ubukhokhelwa liqembu leHighlanders lalabo abake balidlalela. Minyaka yonke kuyakhunjulwa labo abedlula emhlabeni ngokuvakatshela emathuneni abo, kucentwe, kubuthanwe ngesikhumbuzo.
“Ngisase buhlungwini,” kutsho uStanley.
“Lanxa ngibonga kakhulu okwenziwe yiHighlanders ekukhumbuleni uCleopas. Iqiniso yikuthi ngisakhathazekile ngendlela afa ngayo. Watshaywa ngelitshe, kodwa ngenxa yani? Ngisazama ukupholisa amanxeba, njalo umdeni wonke usesesizini. Wayengu Dilo Dilo weqiniso.”
Ukuvakatshela amathuna lokhu bekuyingxenye yohlelo lweminyaka yonke lweHighlanders Former Players Association lokukhumbula asebadlula emhlabeni.
Kwaqalwa ngokuvakatshela ePelandaba Cemetery, lapho abacenta, balungisa ithuna likaCleopas Dlodlo, ngaphambi kokuqhubekela eLady Stanley Cemetery ukuyahlonipha uNkululeko “Chunky”.
UCleopas Dlodlo wazalwa mhlaka 13 Zibandlela 1969, wafa mhlaka 13 Ntulikazi 2009. Ukhunjulwa njengemvimbi yeHighlanders eyayezinikele, futhi eyayithandwa ngabantu.
UStanley uqhubeke wathi: “Njengemuli sizizwa sihloniphekile kakhulu ukubonwa ngale indlela. Kuyathokozisa kakhulu ukubona ukuthi indodana yami isakhunjulwa, njalo siyabonga kakhulu.”
UNicole Sibanda ongumzukulu kaCleopas uthe umcimbi lo ubuyisikhumbuzo esifaneleyo.
“Waziwa yonke indawo njalo ngangimthanda. Ngizahlala ngimkhumbula. Le yindlela efaneleyo yokukhumbula ilifa lakhe njengomdlali weHighlanders ngabanye abadlali ayedlala labo,” kutsho uSibanda.
ELady Stanley Cemetery, abadlali bakudala bahlonipha uNkululeko “Chunky” Dlodlo, okhunjulwa kakhulu ngamandla akhe, ukuthobeka kunye lokuzinikela kwakhe ngesikhathi edlalela iBosso.
Unina kamuyi, uSimami Nyathi, uthe:
“Ngiyikhumbula kakhulu indodana yami, njalo ukubona uthando olungaka luboniswa kuye kungithinte kakhulu.
“Ngithinteke kakhulu njalo ngiyabonga ukuthi usakhunjulwa ngalindlela,” kutsho uNyathi.
UChunky watshona mhlaka 22 Zibandlela 2021, wangcwatshwa eLady Stanley Cemetery mhlaka 27 Zibandlela 2021.
Uhlelo lwaluhlanganisa njalo lembiko ezavela kwabamele imuli, iziphathamandla zeHighlanders Football Club lomgcinisihlalo weFormer Players Association bonke begcizelela ukubaluleka kokulondoloza ilifa leqembu lokuhlonipha labo abake bayidlalela.
Uhlelo lwaminyaka yonke, oluvame ukubanjwa ngempelaviki yakuqala kaZibandlela.
Osaziwayo abakade bekhona nguMadinda Ndlovu, Jerry Sibanda, Thabani Masawi, Mpumelelo Dzowa, Netsai Moyo, Douglas Mloyi, Itayi Masawi loMarko Ndlovu.
Ukuhlangana kanje, kusikhumbuzo kubonisa ubudlelwano obuqinileyo obusaqhubeka obuhlanganisa abadlali bakudala beHighlanders.
