Online Reporter
YiNtatheli kaMthunywa
KULENINA elileminyaka engu-52 leMutasa esabelweni seManicaland elidonsele umkalo enkundleni yenduna likhalaza ngomyeni walo okubikwa ukuthi uyathambisa engutsheni.
Inina leli, uChipo Kembo lithe umkalo uSilver Kembo useyehlise impilo yalo ngokumhlukumeza kunye lokungamnaki.
Uthe isenzo sikaSilver sokuthambisa engutsheni sesimthwalise nzima nanko phela uhlala engowatsha ingubo, yikho nje sedinga uncedo lwenkundla.
“Ngikhathele ngokuhluluzwa. Angavele adakwe kathambisi engutsheni, kodwa mhla enganathanga uyathambisa. Ngiwatsha nsuku zonke ingubo. Kambe ngingenelisa ukuhlala ngikwenza lokhu sengingaka,” kukhalaza uChipo.
Uthe labantwababo abathathu sebesazi uhlupho lukayise.
“Kambe abantwana bazamhlonipha bathini uyise yena eziphatha ngale indlela? Kulokuthi adinge usizo, uyangithethisa nxa ngingakhuluma ngohlupho lolu, kubuhlungu lokhu.”
Ubuye wathi umkakhe yisidakwa loba wake waba ngumkhokheli ebandleni leMugodhi Apostolic Church.
“Nxa edakiwe kathambisi engutsheni. Kangifuni ukulala laye.”
UChipo uveze njalo ukuba ukuthambisa lokhu, ngokuncane kwakhona, kusukela wathathwa nguKembo ngo 2006, nanko loba basebenza nzima ukuthuthukisa impilo zabo, uKembo usesithi indlu ngeyakhe.
“Sasebenza sonke sathenga imota kodwa indodana yakhe yayithatha. Sathenga izifuyo sonke, kodwa uyazithengisa umathanda. Wahamba emahofisini abona ngezomhlabathi wayathatha i-permit engelabizo lami. Usefuna ukungixotsha endlini esayakha sonke. Ngeke ngikuvume lokhu.
Yena usephumile endlini usesebenzisa umthethwandaba ukungixotsha,” kutsho uChipo.
“Ngesikhathi sihlangana wayegula, ngamnakekela, ngamncedisa waze wasila. Khathesi ngoba useqinile uthi mina kangilancedo. Kambe yiyo yini indlela indoda okumele iphathe ngayo umkayo,” kutsho uChipo esehlisa inyembezi.
Ubuye waveza ukuba indodana yomkakhe endala, uNorest Kembo usebambene loyise njalo sebemethusela.
UKembo, uthe leli kayisilo qiniso, uthe uChipo ulambele amandla, akahloniphi futhi ulomhobholo ngenotho yakhe.
“Umama lo kafuni ukwamukela ukuthi ngimnike isehlukaniso, ufuna inotho yami futhi ngeke ekele ukwenza imizamo yokuthi ayithole. Lokhe ehlala epulazini lami loba ngamnika incwadi yokumxotsha,” kutsho uKembo.
UKembo uvumile ukuthi uyachema, kodwa wathi lokhu kubangelwa ngumkakhe.
“Wangiloya. Wangilungisa ukuze ngehluleke ukuhlangana labanye emacansini, khathesi ihloka lami kalisagamuli. Sonke isikhathi ngingalala nginganathanga utshwala ngiyachema.
“Yikho nginatha nsukuzonke. Nxa ngidakiwe, kangithambisi,” kutsho uKembo ebulala inkundla ngembambo.
UKembo uthe umkakhe kakwazi akufunayo.
“Uyasola nginganatha, kodwa ubuya athi nxa ngidakiwe yikho lapho engumsuthisa khona. Kodwa kangisafuni ukuhlangana laye mina ngoba uthi ihloka lami selibuthundu. Nxa nginganathanga, kangenelisi ukuhlangana laye. Ufunani sibi sibili kimi?”
Induna uMutasa ngemva kokulalela laba ababili uthe isenzo salaba ababili sesiphendule umtshado wabo waba yinhlekisa.
“Umtshado kumele ube lokuhloniphana lokubambana, kodwa engikuzwe lapha kuyayangisa.”
Ubuye wabheka kuKembo wathi kayedinga usizo kubodokotela kulokuba acatshe ngotshwala.
Indaba le ibuye yajika sokuvela ukuba ababili laba bendisa umntwana oleminyaka engu-13 yokuzalwa.
Induna ivuke ngolaka yathi ababili laba kumele babotshiswe.
“Lokhe lidlephana lapha lisithi omunye ngumthakathi, omunye uyathambisa engutsheni, lo yisidakwa, kukanti laba lesibindi sokwendisa umntwana. Licala elikhulu leli. Bubili benu kumele libotshiswe, ngizawathuma amapholisa emzini wenu azolibopha.
“Ngeke sigcine abantu esigabeni lapha abendisa abantwana umathanda,” kuthetha induna uMutasa.
