Online Reporter
UMFELOKAZI womculi owayethandwa kakhulu u-Oliver “Tuku” Mtukudzi — uDaisy — uthi usakhuluma leqhawe lemiculo leli emaphutsheni akhe.
NgoLwesihlanu olwedluleyo, besokwedlule iminyaka eyisikhombisa kusukela uMtukudzi atshona.
Umkhokheli weqembu leBlack Spirits, owanikwa isithunzi seqhawe lesizwe, watshona ngemva kokugula ngesifo setshukela mhlaka 23 Zibandlela 2019.
Wayeleminyaka engu-66 yokuzalwa.
Umdeni wakhe wakhetha ukuthi angcwatshwe eMadziva emzini wakhe esigabeni seMashonaland Central.
Abantu abanengi babekhona emngcwabeni weqhawe leli.
Umculi lo, owayehlonitshwa kakhulu, wakhipha ama-albhamu edlula 60 okwenza ukuthi isizwe siziqhenye ngaye.
Njengoba bekulokhu kusenziwa iminyaka yonke, ukutshona kukaTuku kukhunjulwa ngemikhosi etshiyeneyo njengendlela yokugubha umsebenzi omuhle awenzayo okweminyaka eminengi.
Nyakenye, umdeni wakhe kanye labangane bagubha impumelelo yakhe enkulu emculweni kusukela aqala ukucula ngo-1975.
Enkundleni yengxoxo leZimpapers Arts and Entertainment Hub, uDaisy uthe umdeni wabo usadabukile kakhulu ngemva kokutshona kweqhawe leli.
“Kunje lokhe kunzima ukwamukela ukuthi uTuku kasasekho,” utsho njalo.
“Ukungabikhona kwakhe kunzima ukukuzwisisa, ngezikhathi ezinengi ngikhuluma laye emaphutsheni ami. Kunengi osokwenzakele kusukela atshona kodwa siqhubeka sigubha imisebenzi emihle ayenzayo.
“Sihlala sikhuleka ukuthi imisebenzi yakhe ayenzayo iqhubeke njalo siyivikele ngoba wayengumuntu olungileyo othanda wonke umuntu.”
UDaisy ubonge kakhulu abalandeli bakaTuku emhlabeni wonke ngokuqhubeka bemkhumbula.
“Angikwazi ukubonga abalandeli bakhe ngokwaneleyo. Loba ngaphi lapho esiya khona, uqhubeka ephakanyiswa njalo ehlonitshwa ngakho konke akwenzela isizwe kanye lezomculo. Wayengayisilo qhawe elizweni lakhe kuphela kodwa wayethandwa lakwamanye amazwe, lapho umculo wakhe wamukelwa khona ngaphandle kokusebenza gadalala.
“Ukusebenza gadalala kwakuqakathekile kuye, njalo ithemba lethu yikuthi imisebenzi yakhe emihle iqhubeke.
“Kuzafika isikhathi lapho esizafuna khona ukuthi izinyembezi esizikhala zithelele inhlanyelo yothando kanye lokubambana ayitshiyayo ngesikhathi esaphila, njengendlela yokuthi ikhule kuhle.”
UTuku wazalwa mhlaka 22 Mpandula 1952.
Umkhosi weOliver Mtukudzi International Festival of the Arts (OMIFA) uyenziwa umnyaka ngamunye kanye lomjaho we Oliver Mutukudzi Memorial Half-Marathon njengendlela yokumkhumbula.
