Online Reporter
Fungai Muderere
LOBA ekhethwa phakathi kwengcitshi zabadlali kukhalenda yeCastle Lager Premiership, u-Andrew Mbeba uthe ubuyiselwe emuva yikulimala.
Kulandela ukulimala kwakhe, umdlali lo, ongumsekeli kakaputeni eqenjini, wakhitshwa kuqula labadlali bamaWarriors azadlala ku-Africa Cup of Nations.
“Njengomdlali ngihlezi ngihlose okukhulu empilweni. Lonyaka kube yisizini enzima nanko ngilimele kanengi, ikakhulu esigabeni sakuqala. Kodwa, kangizange ngikhalale umdlalo,” kutsho uMbeba.
Umdlali lo, odume ngelithi “Tower” enkundleni, uthe ubonga bonke adlala labo kuHighlanders kunye labaqeqetshi ngokumenza abengumdlali obonakalayo.
“Ukukhethwa kuma-soccer stars kungiphakamise kakhulu. Kukhweze udumo lebizo lami lemisebenzi yami enkundleni. Ngibonga bonke engidlala labo labaqeqetshi ngokungikhuthaza.”
UMbeba lonyaka ubeyinsika kuHighlanders ngesikhathi leliqembu lehluleke ukuthi lidlale kuhle. Wenelise ukuvala lokukhokhela imvimbi ngendlela ethabisa abalandeli kunye labanye abazonda iHighlanders.
Kusenjalo, njengoba isizini isingene kukhefu, kulamahemuhemu aqinisekisa ukuthi uMbeba usesuka kuHighlanders. Umdlali lo ubaliselwa ukuba engaya kuScottland, Simba Bhora kumbe kuFC Platinum.
Ebuzwa ngalokhu, uMbeba uthe kasuki kuHighlanders.
“Ngeke ngikhulume ngalokhu khathesi. Ngisasekhona kuHighlanders. Ngizalandela imithetho yeqembu yokukhitshwa kwembiko enjenga le.”
