admin
YiNtatheli kaMthunywa
LANXA besekugcwele inkulumo zokuthi usemdala njalo angeke alethe inguquko kuHighlanders, kodwa uRalph ‘‘Banolila’’ Matema uthi abalandeli balithimu bazabona okukhulu azakwenza.
Umdlali lo ubike ukuba uzadlalela iHighlanders okweminyaka emithathu elandelayo njalo ulandule umbiko wokuthi kasoke abekhona kulithimu ngomnyaka ozayo.
Ekhuluma loMthunywa ngoLwesithathu, uMatema, odume ngelithi “Banolila” kubalandeli beBosso uthe kumele abekhona kuthimu ka2016 nomakanjani. “Ngisesekhona kuHighlanders. Ngibona angathi ngizadlala okwamasizini amathathu alandelayo. Inyawo zami ziyavuma ngakho akula okungangibisela emuva.’’ UMatema uphenduke waba yisithandwa sabalandeli bakaMantengwane ngeSonto edluleyo ngokuhlohla umbekwa mhla iBosso inqoba iChicken Inn 1-0 kumdlalo wamangqamu kunkezo yeEasycall.
Lokhe waphenduka kuleli evela eSouth Africa, uMatema ubesemlonyeni yababukeli bomdlalo abakade bezibuza ukuthi ulandeni kuBosso. Ufike wagaxa amabhola amathathu kumidlalo yeligi, wabaliqhawe lokunqoba kweBosso kuviki edluleyo.
Ekhuluma loMthunywa uthe kafuni ukuziqakezela ngokuhlohla kwakhe kumdlalo wenkezo yeEasycall kodwa uzizwe eqakathekile ngakwenzileyo.
“Bekumele ngihlohle. Lapha ngitsho ukuthi bekulilanga lami. Ngibonga labanye engidlala labo ngokuphathisa ukuthi ibizo lami liphakame njalo kubalandeli beHighlanders.
“Izinto zingihambela kakuhle lokhe ngahlangana lomqeqetshi wethu uAmin Soma-Phiri,” kutsho uBanolila.
Umgadli lo uphethe ngokutsho isibongo sakhe kubalandeli beBosso.
“Amanga mabi, akula abasekeli abedlula abeHighlanders. Ngibabonga kakhulu ngoba bangivumela ukuthi ngidlale ngikhululekile. Abaqhubeke besenza njalo.’’
Online Reporter