admin
YiNtatheli kaMthunywa
U-ERIC Mudzingwa uthi wayengazi ukuthi kungumlandu omkhulu ukuba ngukaputeni weqembu leHighlanders, ikakhulu ngesikhathi abalandeli bekhangelele ukuba libeyintshantshu yeligi yeCastle.
UMudzingwa wathathela uFelix Chindungwe isikhundla sobukaputeni kumaviki amabili adluleyo, kulandela ukungakhethwa kukaChindungwe emdlalweni.
Ukaputeni lo owaziwa ngokuthi nguTsiba kuthimu yezwe lonke, uthe iBosso ifuna isibindi, okuyikhona okumenza ahlale etshaywa luvalo.
“Ukuba ngukaputeni kutshayisa ngovalo. Ithimu le inkulu njalo kunengi osekukhangelelwe kithi kumidlalo eseleyo.
“Akulamdlali ongayala ukuba ngukaputeni wethimu yakhe. Okutshiyeneyo yikuthi kuHighlanders kulomsebenzi.”
Ngokuvimba akwenzayo kumidlalo edluleyo, inkokheli labaqeqetshi bamethesa umlandu wokukhuza ithimu enkundleni.
Ukuphakanyiswa kwalumdlali kutsho ukuba abaqeqetshi bayamethemba njengomunye wabadlali asebehlale isikhathi eside bekuHighlanders.
Njengomunye wabadlali abadala kuHighlanders, sekumele atshengisele ukuthi uyazi ukukhokhela lokuphakamisa ithimu ukwedlula abanye.
“Ukuze senelise ukusondelela inkezo yeligi, kumele abadlali abadala njengami sidlale ngokupheleleyo. Njengoba sengingukaputeni ukudlala kwami kubalulekile kwabanye abadlali. Kumele ngivimbe amabhola okwedlula abanye.
Uthe kasoke azikhukhumeze ngesikhundla esitsha kodwa ufuna ukuqeda isizini abalandeli beBosso bejabula.
“Ukuncintisana phakathi kwethu njengabadlali kuqakatheke kakhulu ngoba kusikhuthaza ukuthi sibe zingcitshi.
Ngempela ithimu isengozini yokwehluleka ukuba yintshantshu yeCastle kodwa nxa singaguqula umdlalo wethu, lethimu izaqina, sikholise sonke ekupheleni kwesizini.
“Engikukhangeleleyo yikuthi ngenelise ukuba ngukaputeni ozathabisa abaqeqetshi labalandeli bethu.”
Online Reporter