‘Ngizavimba kuze kuyovalwa’

Fungai Muderere

KULEZINSUKU unozinti weHighlanders u-Ariel Sibanda ubonakala ehambela phezulu ezitaladeni zakoBulawayo.
Uyazizwa umfokaSibanda njalo labantu bayamkhuthaza ukuthi azethembe ngoba wenza kuhle lapho evimba amabhola embekwa abethelwa yizethekeli zeScottland FC, kumdlalo weChibuku Super Cup quarter final ngeSonto.

IBosso yanqoba 2-1 kumbekwa le, ngemva kokuba zombili ziqede imizuzu engu-90 zilingene nge 2-2.
USibanda, owaziwa ngelithi “Mangoye” enkundleni, waphenduka waba yintandokazi yabanengi, ngesikhathi izipantsha zeScottland zicabanga ukuthi sezicobodise iBosso eMagumeni.

Ebuzwa ngalokhu akwenzayo, ukaputeni weHighlanders lo uthe kakaqedi njalo uzavimba igedi kuze kuyovalwa.

“Ngesikhathi sinanzelela ukuthi sesitshaywa, ngakhuluma labafowethu, ngabatshela ukuthi ngeke sivume ukunqotshwa sikoBulawayo. Ngathi lapha siseMagumeni, eBarbourfields ngakho kasizameni ukuhlohla. Ngangingakwazi ukuthi sengikhwezele umlilo. Wonke umuntu wakubona lokhu, iqembu selivutha ngokuhlasela.

“Ngokwami, ngithi khona ngisazovala ngci. Ngihlala ngikutsho ukuthi angikapheli moya. Kwaba kuhle ukuzwanana lokulandela izixwayiso zikamqeqetshi wethu uDe Jongh. Yinsizwa ezwanana labadlali, yikho badlalela yena,” kutsho uSibanda.

Uthe njengonozinti osebambele iHighlanders okweminyaka eyedlula itshumi lesithupha, usefunde ukuba unozinti kumele abengumdlali okhaliphileyo.

“Nxa sekufike isikhathi sombekwa, okumele ukwenze njengonozinti yikwenqabela ukuthanda ukudayiva. Qala ngokunanzelela ukuthi lo okhaba ibhola engabe ecabanga ukulibhobozela ngaphi kwegedi.

AbeScottland babengazi ukuthi mina nginguMangoye. Ngiyeqa yonke indawo njalo ngeke wazi engikucabangayo. Lokhu ngakufunda kubaqeqetshi bami yonke iminyaka le.

Uthe inkuthazo alayo kubonozinti abasakhulayo yikuthi kumele babekezele.
“Ukufika lelibanga engikulo kufuna ukubekezela. Hlala uzinzile, ulinde esakho isikhathi,” kutsho uSibanda.