admin
Lungile Moyo
ZISELE zithithibele izakhamizi zeNkayi esigabeni seMangweni ngeSonto kuviki ephelileyo ngemva kokuzwa ngenye indoda ehlephune enye ikhala kubangwa umntwana obelahlekile.
Kubikwa uSiza Mlangeni (40) loMadaya Ndlovu (48) bangqikilane kwabaluthuli okwenze uNdlovu wasala engaselalo elinye ikhala ngemva kokulunywa kubangwa umntwana lo obelahlekile.
USobhuku Micah Silindeni ubikele intatheli kaMthunywa ukuba amadoda la womabili ingxabano yawo iqale ngemva kokulahleka komzukulu kaMlangeni oleminyaka emihlanu edlala labanye.
“UMlangeni walahlekelwa ngumzukulu wakhe edlala labanye abantwana eguswini, kungakho bathi bebona ukuthi umngane wabo abasamboni bayabikela uyisemkhulu basebeqala ukumdinga lezinye izakhamizi eziseduzane,” kubika uMnu Silindeni.
UMthunywa uzwe ukuthi emva kokuba umntwana sedingwe waswelakala umamangala wambona egangeni, engasayazi indlela eya ngakibo kungakho wasehamba laye.
Omunye umfakazi oqotho uNkosikazi Sidumiso Dube ubikele iphephandaba likazulu ukuthi yena wabizwa ngabantwana ezihlalele emzini wakhe.
“Mina ngangizihlalele emzini wami lonkosikazi ngezwa sengibizwa ngokungumfanyana kusithi okhulu bayalwa ngithe ngisiyafika ngathola uNdlovu esebomvu gebhu izigqoko ngisekhatshana ngangisithi uphuma umungula kodwa ngasengisizwa ethi ulunywe ikhala nguMlangeni,” kuchaza uNkkz Dube.
Intatheli izwe ukuthi uNdlovu walunywa ikhala langanxanye lonke, okwenza izakhamizi zamgijimisela esibhedlela.
Kuzwakale ukuthi uMlangeni kazange akutshaye indiva lokhu ngoba waziqondela emzini wakhe engagqize qhakala.
Intatheli ixhumane loMnu Ndlovu wabika ukuthi wabona umntwana egangeni kungakho wasehamba laye emzini wakhe wasetshayela umfowabo kamamangalelwa ucingo ukuthi abuye azomthatha.
“Ngahlangana lomntwana egangeni njengoba ngangisazi ukuthi uyadingwa ngahamba laye emzini wami ngatshayela ucingo umfowabo kaMlangeni ukuthi azomthatha ngoba ngingaboni hlupho ngalokho ngingazi ukuthi sengizithezele olulenkume.
“UMlangeni wathi mina yimi engangitshontshe umzukulu wakhe ngifuna ukumsebenzisa ukuganga yikho nje wangitshaya waze wangihlephuna lekhala,” kubika uMnu Ndlovu
Ngakolunye uhlangothi uMlangeni uchaze ukuthi yena wayengahlosanga ukulizama uNdlovu.
“Into eyangicunulayo yikuthi uNdlovu akhanye esengoletha umntwana njalo engazange angifonele yena esazi ukuthi angihlalisekanga ngiyamdinga lowomntwana.
“UNdlovu wakhetha ukufonela umka-mnawami okuyisenzo esitshengisa ukuthi wayelesazela ngomntwana,” kuchaza uMlangeni.
Usobhuku wakule indawo uveze ukuthi uMlangeni usesezandleni zamapholisa eGwelutshena.
Online Reporter