admin
NJENGOBA iphephandaba likazulu lingelomuntu wonke jikelele kule iviki lize lezinye njalo indaba ezihlabusayo kwezokuthokozisa uzulu. Lamhlanje siliphathele ijaha elimajaha mabili elicula i-house kukhithike umuhlwa ezihlahleni. Kayitshayi nje lindoda yiBig Nuz ngokwayo.
Kambe lingaba ngubani lelijaha elicula kangaka ngaphandle kukaGift Lihlohololo Ndlovu odume ngokuthi nguBhadila nxa esesitikini. Kayitshayi nje lindoda ezomculo yenza izimanga. Qhubeka ubala uzwe imbali ehlabusayo mayelana lalelijaha, uGift Ndlovu (GN) kanye lentatheli yephephandaba likazulu uCornelius Luphahla (CL).
CL: Uzulu uthanda ukwazi ukuthi ngubani uBhadila njalo waqala nini ezokucula?
GN: UBhadila yimi umculi we-house music, ngakhulela edolobheni leBeitbridge noma nje ngake ngahlala kancane edolobheni lakoBulawayo. Ezokucula ngaziqala ngisafunda eJason Ziyaphapha Moyo High School ngesikhathi nginguFomu 5 ngo2013. Lapha ngangicula nje kwathi ngesikhathi senginguFomu 6 ngo2014 yikho engakhipha khona idlalade lami lokuqala.
CL: Kungani wakhetha ukucula umculo we-house njengoba imiculo iminengi kangaka kuleli?
GN: Okwenza ngakhetha ukucula i-house yikuthi ngakhula ngiyithanda kakhulu. Okunye njalo ngakhangwa liqembu leThree Kings elakhipha idlalade elilengoma ethi Iseqa Mabhilidi. Lokhu kwenza ngabona ukuthi lami ngingenelisa ukukhipha elami idlalade ngoba abaculi bengoma le badabuka kuleli labo njengami.
CL: Lokhe waqala ukucula mfokaNdlovu sowakhipha amadlalade amangaki?
GN: Njengomculi osacathula lokhe ngaqala ukucula sengakhipha idlalade elilodwa lama-single kodwa okwakhathesi ngisapheka elinye njalo elizaphuma kungensuku zingaki. Idlalade lami lakuqala ngalikhipha ngo2014 ngisafunda lithi African Child. Sengike ngakhipha njalo ezinye ingoma labaculi abatshiyeneyo abagoqela uAkhonamandla Ndlovu, uMagee, kanye loBlack Moon.
CL: Umphakathi uthanda ukwazi ukuthi wandise ukutshayela ngaphi ingoma zakho njengomculi?
GN: Ingoma zami ngiyake ngizitshayele kuma-shows ikakhulu awabaculi abakhulu abatshiyeneyo. Kwesinye isikhathi ngiyamenywa njalo emitshadweni, emidlalweni etshiyeneyo kanye lakumadili athize. Sengike ngavakatshela endaweni ezehlukeneyo ezigoqela eVictoria Falls, ePlumtree kanye lakwezinye indawo ngiphatheka kuma-shows atshiyeneyo.
CL: Lokhe waqala ukucula abantu bathini ngomculo wakho jahelibanzi?
GN: Abantu bayawuthakazelela kakhulu umculo wami njalo bangikhuthaza ukuthi ngiqhubekele phambili ngomculo wami ngingadeli noma ngihlangana lobunzima. Okunye njalo bangikhuthaza ukuthi ngibakhiphele elinye idlalade ukuze baqhubeke bejabula ngomculo wami.
CL: Ukhangelele ukwenzelani uzulu lonyaka njengomculi njengomculi we-house music?
GN: Lonyaka ngikhangelele ukukhiphela abalandeli bami idlalade elitsha engisaqedisa ukulipheka ukuze badlale iKhisimusi bejabula ngomculo wami babone njalo ukuthi ngiyabakhumbula.
CL: Bunzima bani oyake uhlangane labo njengomculi njalo nkuthazo bani oyipha abaculi abasacathula Bhadila?
GN: Ubunzima engiyake ngihlangane labo yikuswela imali yokuzithuthukisa kwezomculo lokuzithuthukisa mina uqobo. Okunye njalo yikuthi kunzima ukuthi nxa ungumculi osasungula uthole udumo kumbe waziwe ebantwini.
Lokhu kwenza ukuthi ngisebenzise imali engizidingela yona ukuthi ngifafaze umculo wami ebantwini.
Kubaculi abasacathula ngithi kabaqhubekele phambili ngomculo bengadeli njalo kabahloniphe uzulu ukuze bathole usekelo.
Online Reporter