admin
YiNtatheli kaMthunywa
AKULAMQEQETSHI wenguqu olamathalenta amanengi ukwedlula uCosmas ‘‘Tsano’’ Zulu!
Ngaphandle kokulolonga onozinti, uZulu ulembali esuka kude eyokuqeqetsha iqembu lenguqu ngokupheleleyo. Laye nxa ebabaza imbali yakhe, igcwala ingwalo.
Kodwa kukhona ithalenta alalo elizamangalisa inengi labalandeli beHighlanders labathandi bomdlalo.
Ongakaze ahlekiswe ngumqondisi wabaqeqetshi beHighlanders uCosmas ‘‘Tsano’’ Zulu angahle ayezizwela ukuthi umqeqetshi lo ubulala njani abantu ngembambo ehoteleni yeRainbow koBulawayo.
UZulu uyingxenye yabomahlekisa bakoBulawayo ebangaphansi kweqembu elithi Umahlekisa Comedy Club.
Iphephandaba likazulu lizwe ukuba uZulu uzabuthanisa omaqhuzu bamabhizimusi labo bonke abayizikhulu edolobheni lakoNtuthu belande ukuzokholisa indaba eziphuma emlonyeni womqeqetshi lo.
Ekhuluma loMthunywa ngoLwesithathu emini, uZulu uthe abantu ababuye ngobunengi babo bezobulawa zimbambo.
“Yebo, liqiniso eliqotho lelo ukuthi mina uCosmas ‘‘Tsano’’ Zulu ngingumahlekisa. Ngiyenelisa ukukhuluma kuhleke wonke umuntu. NgoLwesihlanu ntambama ngithanda ukunxusa umphakathi wonke, abasekeli beHighlanders labo bonke abafuna ukuthi bahleke. Ababuye ehoteleni yeBulawayo Rainbow,” kutsho lumqeqetshi weTshilamoya.
UZulu utshele uMthunywa ukuthi ulamathalenta amanengi.
“Abantu bangazi ngingumqeqetshi webhola. Kusukela lamuhla ngifuna bazi ukuthi ngilethalenta lokuba ngumqeqetshi, intatheli zindaba lokuhlekisa abantu. Ngiyagida samuntu ongelamathambo futhi.”
Ukwazi ukuhlekisa abantu mhlawumbe yikho okunceda ukuthi abadlali beqembu leHighlanders babonakale bekhululekile ngaso sonke isikhathi.
Abanye abazahlekisa abantu ngobusuku lobu babalisa uBabongile Sikhonjwa, uClive Chigubhu loNtando Van Moyo.
UNtando Van Moyo ongomunye wabaqoqi bombuthano wokuhlekisa uthe isizatho sokunxusa uZulu kulumkhosi sivela ekuthini umqeqetshi lo uthandwa linengi labantu.
“UZulu abanengi bamazi ebholeni kodwa usetshengisele ukuthi uyazi ukuhlekisa umphakathi. Thina njengabaqoqi bombuthano kaMahlekisa Comedy Club, kuyasithokozisa ukuthi uZulu, umqeqetshi wethimu enkulu useyingxenye yethu.”
Online Reporter