admin
Kulezi insuku zokucina abaculi abanengi sebekhetha ukuhambisa ivangeli ngomculo ngoba inengi labantu likhanya likhuthalela ukulalela imiculo elizweni lonke nje jikelele. Kuliviki sidibana lomdlali weziginci njalo engumculi wezokholo weAfro Jazz uThamsanqa Khumalo.(TK)
Indlubu izahlutshwa ekhasini mayelana lalo umculi kungxoxo elandelayo phakathi kukaThamsanqa Khumalo lentatheli kaMthunywa uNcekwenhle Ncube.(NN)
NN: Singakayi khatshana jahelibanzi ungasivezela ukuthi wena ungene njani kwezokucula?
TK: Ezokucula lezi ngingathi yinto engayiqalisa kudala. Ngiqala ukuthanda umculo ngoba ingwevu ezala mina ibiwuthanda umculo njalo bekulesiginci lapha ekhaya ebengihlala ngifisa ukusidlala. Kodwa ngingakaqali ukudlala isiginci ngaqala ngokutshaya ichacho. Isiginci ngiqalise ukusidlala ngomnyaka ka2010.
NN: Ingabe ikhona yini eminye imiculo oke wayikhupha emphakathini kumbe idlalade?
TK: Angikakhuphi idlalade kodwa kuwonalo umnyaka kulengoma engiyikhuphe labanye abafowethu elesihloko esithi, He is able. engomeni leyi sihlabela singabaculi abahlanu ngoba ilendimi ezigoqela isiNdebele, isiSwahili, isiTshewa, isiXhosa lesiShona.
NN: Njengomculi osakhasayo ukhangeleleni emnyakeni ozayo?
TK: Kulengoma ezinengi engisazibhala kanti ezinye zisaphekwa kungakho-ke ngomnyaka ozayo ngifisa ukuthi ngenelise ukukhupha idlalade lami lokuqala. Ngikhangelele ukuthi litholwe phose nguye wonke umuntu okuleli langaphandle ukuze ngalo imphefumulo iguquke iphendukele kuJesu.
NN:Bakhona abaculi abakuthathekisayo ukuze lawe uzibone ukhasela ekuculeni?
TK: Bakhona sibili njalo banengi. Laba bagoqela uVuyo Khumalo, uOliver Mtukudzi, uJonathan Buckler kanye loMinister Takesure. Bangenza ngizizwe ngikhudumala nxa ngiphakathi kwenkundla yokuhlabelela.
NN: Mfihlo bani ongayiveza ekwenze waqinisela kwezomculo wakho lo?
TK: Iqiniso yikuthi ukubekezela kungumanqoba. Ngemva kokunanzelela ukuthi ngilesiphiwo ngahlala njalo ngitshiseka ukuthi kumele ngisihlakulele. Kodwa phezulu kwakho konke uNkulunkulu onguye owangipha isiphiwo lesi nguye umqali lomphelelisi wakho konke.
NN: Ungatsho mhlawumbe ukuthi kulohlupho oke wahlangana lalo olwakusindayo waze waphosa wabeka phansi amajogwe kwezomculo?
TK: Inhlupho zikhona sibili. Imali yiyo eluhlupho kakhulu ngesikhathi ngizama ukupheka ingoma kuyikho nje kungathi kuthatha isikhathi ukukhupha idlalade.
Okunye njalo ngike ngahlangana lohlupho lokuswela imitshina eyaneleyo ngesikhathi ngiqala ukuhlabela. Noma nje kunjalo angikaze ngifike ezingeni lokuthi ngicabange ukufulathela isiphiwo sami. Kulithamsanqa kimi ngoba imuli yami layo ikhanya iyawuzwisisa umculo njalo iyangisekela ngazo zonke indlela.
Online Reporter