Online Reporter
Lovemore Dube
NXA kulomuntu otshontshela iHighlanders imali, kumele aziveze kumbe atshiye isikhundla ngoba abalandeli beqembu babika ukuthi abasoke badele umoya ngokufukula amasela, okucatshangelwa ukuthi asehuquluze amaqubaquba emali eqenjini.
Abalandeli bakhuluma lokhu bengakufihli emphakathini, nanko sekulomkhankaso othi: “Sikhathele ngani masela”. Umkhankaso lo uhlose ukuthola iqiniso mayelana lokuphathwa kwemali kuleliqembu.
NgeSonto, kumdlalo leGreenfuel obusenkundleni yeBarbourfields, kulehlekana labalandeli elethule umbiko obulamazwi athi: “Sifuna inguquko, Ubukhokheli obutsha ku-executive lakubhodi, Phansi ngokuhuquluzwa kwemali zeBosso. Sikhathele Ngani Masela, Asifuni Bumbulu.”
Amazwi la atshengisele ukukhathala lokuthukuthela okukhona kubalandeli lamalunga eHighlanders, akholwa ukuba kulobungilimbane obedluliseleyo nanko akuthethwa amacala ngendlela efaneleyo, osekudala ukuthi iqembu lingenzi kuhle.
Kodwa, phakathi kwakho konke, umgcinisihlalo webhodi yeHighlanders uLuke Mnkandla uvumile ukuthi wakubona ukutshengisela kwabalandeli njalo akumangalisi.
“Ngiwabonile ama-placards. Kungumbono wabo wokungabi lethemba kubukhokheli, lokho kuzaba ngumlandu wamalunga uqobo,” nguMnkandla lo etshela iZimpapers Sports Hub.
“Ngilesiqiniseko sokuthi inkokheli ziyasebenza njalo zenza konke okusemandleni azo ukuthi iHighlanders iphumelele.”
Ukungezwani phakathi kwenkokheli zeHighlanders labalandeli beqembu kuvela ikakhulu ngemva kokungaphathwa kuhle kwecala eletheswa isisebenzi seqembu uSihlalisiswe Mnkandla, owasolelwa ukuhuquluza imali ngo-2023.
Ukuthethwa lokuhlaziywa kwalelicala sekudonse inyanga ezedlula i-18 ngenxa yokuthi kulamaphepha athile angabonakaliyo.
Owayengumaqhuzu weqembu uBrian Moyo watshiya umsebenzi kubikwa ukuba wayelesandla ekuhuquluzeni imali yokuthengiswa kwabadlali phakathi kweHighlanders leBulawayo Chiefs. Kulelicala, elisemthethwandaba, kubikwa iBosso yabhadala iUS$23 000 kodwa iChiefs yathola iUS$18 000. Isisebenzi seChiefs u-Andrew Mandigora wavuma ukuthi kwaba lobungilimbane, uMoyo wala.
Sekuvele njalo lokuthi akhona amaphepha eqembu aqakathekileyo angasabonakali, lokuthi kulemfihlo esiphuma ngudlu kuleliqembu.
Sekuyiminyaka engu-15 iHighlanders isadalala, abalandeli besethesa inkokheli ngokwehluleka umsebenzi. Ukuthukuthela lokhu kubonakala kakhulu ngesikhathi sokuvotela amalunga e-executive.
Iqembu likunombolo yesitshiya galombili, okwenza abalandeli labathandi balithimu bengahlaliseki.
