Online Reporter
YiNtatheli kaMthunywa
UMSEKELI kaMphathintambo wogatsha lwe-Information Communication Technology, Postal and Courier Services, ophinda abengumeli wesigaba seBulilima ePhalamende, uDingumuzi Phuti, usencome uhlelo lwe-Community Areas Management Programme for Indigenous Resources (Campfire) ngokuphakamisa impilo zabantu bakulindawo.
Ukhulume lokho ngesikhathi umphakathi weBulilima uthola isipho samajongosi amabili sivela kuCampfire, ibambisane leBulilima Rural District Council (RDC) ngaphansi kweMvimi Safaris.
Amajongosi la, awohlobo lwe-Brahman, ethulwe ngoLwesihlanu olwedluleyo eMatiwaza Hall, koNdolwane.
Ekhuluma lephephandaba likazulu ngoMvulo, uMhlonitshwa uPhuti uthe abantu beBulilima kumele bathathe isipho sezifuyo lezi ngazo zonke izandla.
Ukhuthaze iMvimi Safaris kanye leBulilima RDC ukuba bethathele phezulu ukuphakamisa isigaba seBulilima.
“Sibonga isipho esikhulu esivele kuCampfire. Le yinotho okumele siyilondoloze, ilethe impucuko, kube lomehluko emulini. Yikho okuqinisekiswa nguHulumende, ngenhloso yokuthi abantu bathole inhlalakahle lapho abahlala khona.
“NjengeBulilima silenhlelo ezitshiyeneyo ezokwakha izikolo amakilinika, ngakho kungaba kuhle ukubana iRDC leMvimi Safaris bephatheke ekuboneni ukuba lezinhlelo ziyakhwa zisebenze,” kutsho uPhuti.
Inkomo lezi ziphiwe izakhamizi eziku-Ward 10 eBambadzi laku-Ward 9 eMakhulela. Indawo lezi zingcelane ledamu leMaitengwe, lapho okwandise ukuba lezivakatshi ezithanda ukubona imvelo lokuqhuba imidlalo ethile. Isipho lesi silandele esinye lapho okwaphiwa khona induna zeBulilima District inkunzi eziyisithupha.
