shloboe boe
Innocent Kurira
AMALUNGA enhlanganiso yeBasketball Union of Zimbabwe (Buz) athabe amanzi te ngokubalwa komdlali uVitalis Chikoko kulabo abakumbango wesicoco People’s Choice Award ku-Annual National Sports Awards (ANSA).
Umkhosi we-ANSA uzaqhutshwa mhlaka 30 Mbimbitho edolobheni leHarare. Indikimba yezicoco lezi ngethi: “Ukubeka izinga legolide”.
Kuzabe kungokwakuqala kuphawulwa ihlandla lesicoco sePeople’s Choice Award. Umkhosi we-ANSA uzabonga abadlali abangu-15 abaphuma kumidlalo efika engu-12 njalo kusicoco sePeople’s Choice, uChikoko uzabe encintisana loPaige Van Der Westhuizen (swimming), Sasha Chimedza (tennis), Tapiwanashe Makarawu (athletics), Tapiwa Mafura (rugby), Benjamin Lock (tennis), Kellis Ndlovu (cricket), Isaac Mpofu (athletics), Scott Vincent (golf), Felistus Kwangwa (netball), Temba Gorimbo (mixed martial arts), Chido Maenzanise (strongman) loKudakwashe Chiwandire (boxing).
Umongameli weBuz uJoe Mujuru uthe umuntu wonke kunhlanganiso yabo ujabulile ngokubalwa kwebizo likaChikoko ngoba umdlali lo usephakamise umdlalo we-basketball lefulegi yelizwe.
“Kuhle ukubona ukuthi umsebenzi kaChikoko enkundleni uyabonakala. Ukubalwa kwakhe, ekhethwa kumncintiswano sePeople’s Choice Award kuyitshengiselo sokusebenza nzima akwenzileyo ku-basketball lokuzimisela kwakhe kulumdlalo.
“Usedlale kuhle eFrance, waba ngumzekeliso kwabasakhulayo kuleli lakwamanye amazwe e-Africa abafisa ukufinyelela isigaba akuso,” kutsho uMujuru.
Ukuphumelela kukaChikoko ku-basketball eFrance kuyancomeka. Ukhokhele iqembu leDijon lanqoba kumqhudelwano we-Coupe de France 2024, bathwala inkezo benqoba 83-70 phezulu kwe-Strasbourg.
UChikoko, oyi-2.08m ubude, uphinde wathola isococo seMost Valuable Player (MVP) kuligi, amasizini amabili elandelana, okwenze waqinisa isithunzi sakhe njengomdlali oyingcitshi kuFrench Jeep Elite ProA league.
Ufike kwele-Europe ngo-2011 lapho adlala kuBG Goettingen eGermany. Kusukela lapho, usedlalele amaqembu amakhulu agoqela iTBB Trier, Reggio Emilia leFC Bayern Munich.
Online Reporter