Online Reporter
Thokozile Mbedzi
KULENDODA yakoChivi ebotshwe ngamapholisa kuviki ephelileyo, kulandela ukutholakala ilezidakamizwa ezigoqela imbanje eziyi 4kgs kunye lamambodlela eBronclear, eyaziwa kakhulu ngokuthi yiNgoma, angu-30.
Kubikwa uOcean Ncube oleminyaka engu-25 utholakale elezidakamizwa emzini wakhe, ngemva kokuba amapholisa ethole udletshana kubomakhelwane ukuthi uthengisa izidakamizwa ngoba kubonakala abantu bephithizela emzini lo.
Isikhulumi samapholisa esabelweni seMasvingo, u-lnspector Kudakwashe Dhewa, uthe amapholisa abophe uOcean Ncube ngemva kokumthola elezidakamizwa.
“Amapholisa athole udletshana lokuba kukhona okungekho emthethweni okwenzakala emzini lo.
“Amapholisa asukumela phezulu ayahlolisisa emzini lo, bathola imbanje eziyi 4kg, amambodlela angu-30x100mls e-Bronclear,” kutsho uInsp Dhewa.
Uphethe ngokuthi amapholisa athanda ukubonga uzulu ngokubazisa ngabantu abaphatheka kuzinto ezingekho emthethweni.
“Siyambonga uzulu ngokusazisa ngabantu emphakathini abenza izinto ezingekho emthethweni ngoba kwenza bafinyelelwe yisandla somthetho.
“U-Ocean Ncube usezandleni zamapholisa khathesi,” kuphetha uInsp Dhewa.
