Online Reporter
Siphathokuhle Ngulube
Salibonani bafundi. Ngithemba liqhuba kuhle ezifundweni zenu. Kuleli iviki sizakhangela ukumiswa kwamaphepha ethu omhloliso wokuphela komnyaka kuhlelo lwezifundo olutsha (HBC).
Okumqoka okufanele sikukhumbule yikuthi isiNdebele sesihlangene saba liphepha elilodwa. Lokhu sixoxe ngakho kabanzi ngeviki ephelileyo. Ekupheleni komnyaka sizahlangana lamaphepha amabili azabe elemibuzo egoqela konke esizabe sikufundile. Kuzagoqelwa konke kuphepha lakuqala lephepha lesibili.
Iphepha lakuqala lizabe lehlukaniswe laba yizigaba ezintathu. Isigaba sakuqala, esesibili lesesithathu. Kusigaba sakuqala bafundi, sizahlangana lezihloko zezindaba eziyisikhombisa (7). Wena njengomfundi uzabe ukhangelelwe ukuba ukhethe isihloko esisodwa obona angathi ungabhala ngaso utshengise ubuciko kanye lekhono lakho lonke lokuloba. Indaba ozayibhala izabe ilemiklomelo engamatshumi amahlanu (50).
Okuqakathekileyo yikuthi uzwisise isihloko obhala ngaso ukuze ubhale Indaba ezakupha imiklomelo ethe thuthu.
Likhona inani lamabala elikhangelelweyo elingamabala angamatshumi amathathu kusiya kumatshumi amathathu lengxenye. Imiklomelo izaphiwa kukhangelwa ukuba wanelisile yini ukubhala inani lamabala elikhangelelweyo.
Isigaba sesibili sizakuba lendaba yokuzwisisa kanye lesifinqo. Indaba yokuzwisisa izabe ilemiklomelo engamatshumi amabili (20) kuthi isifinqo sibe lemiklomelo elitshumi (10). Lapha umfundi uyakhuthazwa ukuba abale azwisise Indaba ukuze phela enelise ukuphendula imibuzo ngendlela ebuzwe ngayo.
Isifinqo laso sidinga ukuba umfundi abale azwisise indaba ukuze phela enelise ukudinga imicijo ekhangelelweyo ezaphendula imibuzo. Phela isifinqo uyabe udinga imicijo ethile, awumane ubuthe konke nje.
Kusigaba sesithathu sizahlangana kulimi. Ulimi luhlanganisela izaga, izitsho, amagama atsho izinto ezimbili lilinye, izenzukuthi lokunye nje okunenginengi. Isigaba lesi sidinga ukuba umfundi abe lolwazi olugcweleyo ngendlela ulimi lwesiNdebele olusebenza ngayo kuzigaba ezehlukeneyo. Isigaba lesi silemiklomelo engamatshumi amabili (20). Iphepha lethu lakuqala lilemiklomelo elikhulu (100).
Ake sikhangele iphepha lethu lesibili. Lalo lilezigaba ezintathu njengephepha lethu lakuqala. Isigaba sakuqala sigxile kakhulu ekusetshenzisweni kwencezu zenkulumo ezehlukeneyo lokwakhiwa kwazo (uhlelo). Kulesi isigaba kuzakuba lemibuzo emine kodwa umfundi ukhangelelwe ukuphendula imibuzo emibili. Leyo mibuzo izakuba ilemiklomelo engamatshumi amabili lanhlanu (25).
Besekusiba lesigaba sesibili. Lapha sizahlangana lezinkondlo. Kuzakuba lemibuzo yezinkondlo emithathu. Umbuzo owodwa uzabe ilemiklomelo engatshumi amabili lanhlanu (25). Umfundi ukhangelelwe ukuphendula umbuzo owodwa zwi azitholele imiklomelo yakhe.
Isigaba sesithathu sona siqukethe izingwalo esizazibala ezihlanganisela lemidlalo. Kuzakuba lemibuzo emine ezabe ivela kuzingwalo zonke esizibalileyo. Umfundi ukhangelelwe ukuba aphendule imibuzo emibili kulesi isigaba.
Imibuzo le izabe ilemiklomelo engamatshumi amahlanu isihlanganisiwe (50). Iphepha lethu lesibili lalo lilemiklomelo elikhulu (100). Ngithemba sizwisisile ukuthi ami njani amaphepha ethu bafundi. Lokhu kuzasinceda kakhulu ekulungiseleleni imihloliso yethu.
Sikhumbule njalo ukuthi kulesichwayisiso okumele sisenze (Project) imiklomelo yaso layo izangena kumiklomelo yethu yokuphela komnyaka. Sizakhangela ukumiswa kwesichwayisiso kusifundo esizayo. Asihlanganeni ngeviki ezayo.
