Online Reporter
Nkosilathi Sibanda
KUZAQHAMUKA impi enzima enkundleni yeMandava ngoMgqibelo lapho iqembu leFC Platinum elizakwamukela eleScottland kumdlalo weCastle Lager Premiership.
Lo ngumdlalo omkhulu nanko zombili zilemiklomelo engu-40, njalo zitshiyana nge-goal difference yamabhola amabili.
Izimbamgodi zePlatinum zihlezi kunombolo yesithathu, kuthi abafana bakaScott bakunombolo yesine.
IScottland FC kuzamele kube liqembu elizaqala ukunqoba iFC Platinum, nanko lokhe ingakanqotshwa kumidlalo engu-22.
Enkundleni yeMandava kukhangelelwe ukuthi kugcwale phamu, njengoba iScottland izakwethula umdlali wayo omutsha uKnowledge Musona.
Umqeqetshi weFC Platinum uNorman Mapeza uthe bayilindele iScottland.
“Njengayo yonke imidlalo yethu, sizadlala ngokuzimisela. Ngiyazi ukuthi abantu bawukhangele lumdlalo kodwa kithi kufana lemidlalo yonke nje. Sifuna ukunqoba.”
IScottland iphinde yathenga loMafios Chihweta owayedlalela iHighlanders. Umqeqetshi waleliqembu uTonderai Ndiraya uthe: “Siyajabula ukuba labadlali laba uKnowledge loMafios. Sikhangelele utshintsho eqenjini. Okumele sikwenze yikuthi silwele ukugcina indawo yethu siphakathi kwamaqembu amahlanu aphezulu, kusiyaphetha isizini.”
Kweminye imidlalo, iHighlanders izangqikilana leNgezi Platinum Emagumeni ngeSonto.
Abafana beTelOne balubhekise kuManica Diamonds, enkundleni ye-Ascot, kuthi le ekhokhelayo kulogu iSimba Bhora, izakwamukela iChicken Inn eWadzanayi Stadium.
IDynamos iqondana leMWOS eRufaro.
Imidlalo yeviki lesi-24 kuCastle Lager Premiership:
NgoMgqibelo: TelOne v Manica Diamonds (Ascot), Simba Bhora v Chicken Inn (Wadzanayi), Dynamos v MWOS (Rufaro), ZPC Kariba v Greenfuel (Nyamhunga), FC Platinum v Scottland (Mandava)
NgeSonto: Highlanders v Ngezi Platinum (Barbourfields), Herentals College v Kwekwe United (Rufaro), Bikita Minerals v CAPS United (Gibbo).
