Online Reporter
Lovemore Dube
U-PIETER de Jongh, umqeqetshi webhola likanobhutshuzwayo osesebenze kumaqembu amanengi, kubikwa useqhamuke njengomunye walabo abazahlolwa, kudingwa umqeqetshi weHighlanders.
Umqeqetshi lo wake wayikhuza ekaMatshobane ngesizini ka2019, wanqoba inkezo yeChibuku Cup. Amahemuhemu okuphenduka kwakhe kuHighlanders aqale lapho ebonakala ehamba lezinye inkokheli zeqembu eRufaro Stadium ngeSonto, kumdlalo weCAPS United leHighlanders.
Esuka kuHighlanders umqeqetshi lo wasebenza kuFC Platinum, waqeqetsha iqembu lelizwe leSomalia, iSilver Stars yeMalawi, wasesiya kuJwaneng Galaxy, eBotswana lapho ahlale khona inyanga ezimbili kulumnyaka.
Ebuzwa ngodaba luka de Jongh, isikhulumi seHighlanders, uNozibelo Maphosa uthembise ukuphendula imibuzo ngoMvulo, kodwa kazange akwenze lokhu.
Kodwa, okuqinisekisa ngempela ukuthi lumqeqetshi usekuBosso yikubonakala kwakhe elomaneja weqembu uNetsai Moyo, ngesikhathi abadlali belolonga ngoLwesibili.
Kubikwa uze wazibika kubadlali lamanye amalunga equla labaqeqetshi lezisebenzi. “Ufike wazibika kubaqeqetshi lakithi, esithi iqembu lisalungisa i-permit yakhe,” kutsho omunye wabadlali.
Kubikwa umqeqetshi lo utshele inkokheli zeHighlanders ukuthi uzaletha abadlali abatsha abane.
Kusenjalo, obengumdlali weHighlanders uMafios Chihweta usethengwe yiScottland nge-US$50 000.
Ngesikhathi isazama ukudinga umqeqetshi omutsha, iHighlanders iyehluleke ukuthenga abadlali abagoqela u-Obrey Chirinda, Nqobizitha Masuku loLynoth Chikuhwa.
UChirinda uthe kasuki0 kuNgezi Platinum, lapho asephiwe isikhundla sokuba ngukaputeni. UChikuhwa wathathwa yiChicken Inn.
