Online Reporter
Nkosilathi Sibanda
NGOMVULO ntambama abafana abamele ilizwe kumdlalo wenguqu, amaWarriors, azadlala leLesotho, kumdlalo wokucina kumkhankaso we2026 FIFA World Cup Qualifier enkundleni yePolokwane.
Umdlalo ungehola lesithupha ntambama.
Ngemva kwemidlalo eyisitshiya galombili kulumkhankaso, amaWarriors alokhe esadinga ukunqoba. Asanda kuvela kumdlalo onzima leSouth Africa lapho ababambe khona omakhelwane, umdlalo waphela ngokulingana nge 0-0.
Amaqembu la akuGroup C ndawonye leBenin, Rwanda leNigeria. AmaWarriors alemiklomelo emihlanu njalo angeke afinyelele kuWorld Cup. Ngokubika komqeqetshi uMichael Nees, imidlalo ebisele eyama-qualifiers, bayiphatha njengamalungiselelo omqhudelwano we-Africa Cup of
Nations (Afcon) ezakuba khona ngoMpalakazi, eMorocco.
Umqeqetshi lo ukhulume lentatheli ezilandela imidlalo le, eSouth Africa, lapho abike ukuba ukudlala ngokulingana leBafana Bafana kubanikeze idlabuzane lokunqoba.
“Indlela esadlala ngayo yasikhukhumeza. Aphezulu amadlabuzane phakathi kwabadlali, abaqeqetshi lethimba lonke jikelele,” kutsho uNees.
Iqembu leLesotho lilemiklomelo eyisitshiya galolunye kuGroup C. Libukeka kuliqembu eliqinileyo.
KuNees, okuzadingeka ukuthi akwenze kulumdlalo yikuqinisa kugatsha lwabadlali basemuva lalabo abadlala esiswini ngoba kubonakele iphutha kulezondawo.
Kukhangelelwe ukuthi kuqula lakuqala labadlali abazabumba iqembu, kukhethwe phambili abadlali abangaka phiwa ithuba lokudlala. Umqeqetshi kumele aphingise ukungenisa uWalter Musona, Tawanda Maswanise loTawanda Chireya. Abadlali laba batshengisa ukuzimisela.
NgoLwesine kumele aphume lemiklomelo yonke.
