Online Reporter
Kingstone Mapupu
MUDZIMAI ane makore 18 okuberekwa wekwaSabhuku Madzura kudunhu raMambo Sahi, kuGokwe South akasungwa nemhosva yekuponda mwanakomana wemukadzi mukuru wemurume wake.
Nyaya iyi inonzi yakaitika nemusi wa13 Kukadzi.
Mutauriri wemapurisa kudunhu reMidlands, Inspector Emmanuel Mahoko, vanoti mwana akapondwa uyu ndiAlvin Makore uyo anonzi akapondwa nemudzimai wababa vake mudiki, Sharai Foromani.
“Mwana uyu aigara pamusha apa pamwe chete naamainini vake mudzimai wababa vake semhuri. Alvin Makore anonzi akabva pamba achida kunozvibatsira kusango rekuseri kwemusha wavo apo amai ava (Foromani) vakamutevera ndokunomutakura vakaenda naye kusango riri kure kwemusha uko vakanomudzipa akafa,” vanodaro Insp Mahoko.
Mudzimai uyu anonzi paakaona kuti auraya mwana uyu akabva asiya akanda mutumbi wake mumakwenzi panzvimbo iyi musango imomo.
“Mushure mekusaona mwana uyu Alvin Makore kwechinguva, sekuru vake Dambudzo Machona (55) vaigarawo pamba apa vakazobvunza Sharai Foromani kuti mwana aiva aenda kupi, apo vasina kupindurwa mhinduro inogutsa,” vanodaro Insp Mahoko.
Nekudaro sekuru ava nevamwe vanhu vakatanga kutsvaga mwana uyu kumasango ari padyo nemusha wavo vachibva vazowana mutumbi wake musango. Panzvimbo yakawanikwa mwana uyu panonzi paiva nematsimba etsoka dzaForomani.
“Foromani akasungwa nemapurisa apo nyaya iyi iri kufambira mberi nekufeewa,” vanodaro Insp Mahoko.
Mudzimai uyu ari kutarisirwa kumiswa mudare reGokwe Magistrates Court munguva pfupi iri kutevera nekuda kwemhosva yaari kupomerwa yekuponda iyi.
Mutumbi wemwana uyu wakazotakurwa kuendeswa kumochari yechipatara cheGokwe uko wakamirira kuongororwa nanachiremba.
