admin
YiNtatheli kaMthunywa
UMQEQETSHI wamaWarriors uCallisto Pasuwa ubike ngokuzethemba ukuthi iqembu lakhe lizafika kuma-final omqhudelwano weAfcon lingazange linqotshwe.
AmaWarriors angene uhambo olude esiya ezweni leGuinea ukuyaqedisa umkhankaso wenkezo yeAfcon yomnyaka ka2017 lapho iqembu lakuleli elizaphatheka khona.
Imidlalo yeAfcon 2017 izakuba seGabon ngoZibandlela.
Umdlalo lo uzaqhutshwa ngeSonto njalo uPasuwa ulakho ukuba nguye yedwa umqeqetshi ozancintisa iqembu lakhe lingazange linqotshwe kuyo yonke imidlalo kusigaba sokudinga indawo yokufika kuma-final.
UPasuwa ubika ukuthi ulesiqiniseko sokuthi amazwe abaqala ukudlala lawo ngo2017 awasoke alibona kulumqhudelwano.
“Sesingenile kuma-final eAfcon loba sisasele lomdlalo owodwa lesizwe seGuinea. Umdlalo lo kumele siwunqobe ukuze sihlonitshwe njengeqembu elingazange linqotshwe,” kubika uPasuwa andubana ahambe lamaWarriors kweleGuinea kuliviki.
“Abadlali babikelwe ukuthi kumele banqobe noma kanjani. IGuinea izafuna ukusitshengisela ukuthi ayisithimu encinyane. Sihamba sisazi konke lokhu. Asizitshayi isifuba kodwa sizimisele.”
UPasuwa uthe leli lithuba lamaWarriors lokuthi abezingqwele zenguqu yeAfrica.
“Iphupho engilalo yikuthi sizayiphakamisa inkezo yeAfcon. Kungabe kuzwakala kuliphupho nje kodwa siyethemba ukuthi sizamangalisa, iZimbabwe ibonakale kumazwe alenguqu yaphezulu eAfrica.
Kusenjalo, isikhulumi seZimbabwe Football Association uXolisani Gwesela uthe iqembu lesizwe lithole usekelo olugcweleyo kunhlanganiso yabo.
Nanti iqembu likaPasuwa elizadlala leGuinea ngeSonto:
Onozinti: Tatenda Mkuruva (Dynamos), Donovan Bernard (How Mine), Nelson Chadya (Ngezi Platinum).
Imvimbi: Blessing Moyo (Maritzburg United), Teenage Hadebe (Chicken Inn), Onismor Bhasera (Supersport), Costa Nhamoinesu (Sparta Prague), Godknows Murwira (Dynamos) Lawrence Mhlanga (Chicken Inn).
Abaphakathi: Willard Katsande (Kaizer Chiefs), Marvellous Nakamba (Vitesse Arnhem), Danny Phiri (Golden Arrows), Kudakwashe Mahachi (Golden Arrows), Marshall Mudehwe (FC Platinum), Tafadzwa Kutinyu (Chicken Inn).
Abagadli: Tendai Ndoro (Orlando Pirates), Nyasha Mushekwi (Dalian Yifang), Knowledge Musona (KV Oostende), Cuthbert Malajila (Bidvest Wits), Evans Rusike (Maritzburg), Mathew Rusike (Helsingborgs IF).
Online Reporter