Online Reporter
Lovemore Dube
IQEMBU lomdlalo wokuqaga, iMbizo Queens libika ukuba likhangelele ukuphuma lemiklomelo yonke kulimpelaviki kumidlalo yeNedbank Premier Netball League.
Le yimidlalo yakuqala koBulawayo yaleli iqembu elaqeda isizini edluleyo likunombolo yesithupha kungalane yamaqembu.
Lidibana lamaqembu amathathu, iHarare City, Harare District leZimstat kulimpelaviki, limi kunombolo yetshumi kuNedbank Premiership okwakhathesi, sekudlalwe imidlalo eyisitshiya galombili.
IHarare District iphansi kweMbizo Queens lobanje zilingana kumiklomelo. IMbizo izabuya idibane leHarare City yona elemiklomelo elitshumi lambili.
Okwakhathesi, iHarare City ingeyesihlanu kulogu njalo isileminyaka ibalelwa kumaqembu atshisayo kwezokuqaga.
Elesithathu iqembu elizadlala leImbizo yiZimstat Inyanga.
Kunzima, kuyasinda kuyitshe kumantombazana aseManicaland la ngoba afumbathe umoya nanko akanqobi.
Sebehlohle amabhola angu-78, kodwa bahlohlwa angu-738, okutshengisa ubunzima abalabo kumncintiswano lo.
Amaqembu abalisa iDolphins leZhombe Chibbs Queens lawo azabe ekoBulawayo.
Umgcinisihlalo weMbizo Queens uRosemary Moyo uthe basebenze kakuhle belungiselela.
“Sizakuba lemidlalo yeNedbank Premier League kulimpelaviki. Sinxusa bonke abathanda lumdlalo lapho okuzabe kulamaqembu amathathu,” kutsho uMoyo.
“Sizadlala leHarare City, Harare District leZimstat Inyanga. Kukhona okunengi esikulungisileyo ukuze abantu baze ngobunengi babo ukuzosisekela njengeqembu. Sifuna imiklomelo yonke.”
Umsekeli kamqeqetshi weqembu leMbizo Queens uSehliselo Ndlovu uthe bazimisele ukuthi badlale kuhle.
Uthe lonyaka iqembu labo liqinile njalo lilethuba lokwenza ngcono njengoba selithole uSaziso Dube obekuqembu leGreenFuel.
