Online Reporter
WEHLULEKA lokuyichaza injabulo alayo uSheli Masondo osanda kubuya edolobheni leCalifornia, e-USA, la akade ehambele khona umbukiso iSan Diego Comic Con, okungumcimbi okubukiswa kuwo ingqephu yesintu ebonakala emidlalweni ehlukene emhlabeni.
USheli ubeye kulo mcimbi ngomsebenzi wakhe wezokugqoka esetshenziswa emdlalweni uShaka-Ilembe okhonjiswa ngeSonto, kuMzansi Magic.
Ekhuluma ngokuba yingxenye yalo mcimbi, uSheli uveze ukuthi ukuba sendaweni eyodwa labantu abadumile emhlabeni abasemkhakheni ofana lowakhe kumjabulise kakhulu.
Uthe kubona bekukhona u-Antoinette Messam owenza izimpahla ezazigqokwa kufilimu ethi The Harder They Fall, Gersha Phillips (Star Trek: Discovery), Charlese Antoinette (Children of Blood and Bone) loLauren Miller (SupaCell).
“Lamanje angikakholwa ukuthi ngithole ithuba lokuya emcimbini walolu hlobo, ngiselemizwa ehlukene yenjabulo kanjalo lovalo. Ukuya kulo mcimbi lakho ngenye yezinto ezingijabulisileyo.
“Ukubona izimpahla zokugqoka ezenziwe yimi zikulo mbukiso njengoba zigqokwa kuShaka-Ilembe kutsho ukuthi zidonse amehlo abathize, hayi nje eMzansi kuphela kodwa lakwamanye amazwe,” kutsho yena. Uthe kulo mdlalo akubanga nje yizindaba ezixoxwa khona ezenze umdlalo waba lendumela kodwa ngitsho izimpahla, izingoma kanye lendlela abenza ngayo izinwele ibe ngundabamlonyeni uma kukhulunywa ngomdlalo usuwonke.
“Kulo mdlalo sisebenzise izinto zemvelo ukwenza izimpahla ezigqokwa abalingisi, lokhu sikwenze ngenjongo yokuthi uhambisane lomlando wesizwe samaZulu ukuthi abantu babesebenzisani ezikhathini zakudala ukufihla imizimba yabo. Isikhumba sembuzi yisona esisisebenzise kakhulu. Amathambo, izimpondo zenyamazana ezehlukeneyo, izimpaphe, utshani lamagxolo yizo zonke izinto esizithetheyo sakha ngazo izinto ezihlukeneyo. Okunengi sikulande eMgungundlovu laseKrugersdorp,” kuchaza yena.
Uthe impahla ngayinye bayikhethe ukugqamisa isiko lokuveza ukuthi umlando usuka kuphi.
Uveze ukuthi ukwenza izimpahla ezigqokwa uQueen Ntombazi (Khabonina Qubeka), lezigqamisa ubuthakathi, ezikaKing Zwide kaLanga (Wiseman Mncube) ezitsho impumelelo ngezinye ezibe umlando kuye ngoba zimenze kwadingeka ajule ngomqondo ukuthi zizoba ngezinjani.
Uthe akufisayo yikuthi ahlangane labasiki bengqephu abasebancane kuleli ukuze abasize bathuthuke.
