Online Reporter
YiNtatheli kaMthunywa
ZITHWELE imikhono ekhanda indlamanzi ebezikhelela umagwebu ngoLwesibili emadabukakusa eKidza Nightclub, koChigumira, eLuveve koBulawayo kulandela ukugwazwa kwamadoda amabili afa.
Abedluleyo kubikwa nguBishop Ncube (46) weLobengula West loMalach Ndlovu (40) weLuveve kulandela ukugwazwa.
UMsekeli wesikhulumi samapholisa koBulawayo uAssistant Inspector Thandekile Ndlovu uthe mhlaka 15 Mfumfu ngehola lika-2 ekuseni indoda eleminyaka engu-39 yalandwa ngelinye inina elingaziwayo yabikelwa ukuthi uBishop Ncube uhlaselwa ngamadoda ayisikhombisa ‘angomakorokoza’.
Kubikwa wagijima waya ebhawa le wathola uNcube elele phakathi kwegazi egwazwe esiphaqeni kunye lemlenzeni wesandleni sokudla, wahle wamgijimisela esibhedlela seMpilo.
Ungezelele wathi ekuchwayisiseni kwamapholisa athola igazi egedini balilandela bafica njalo uNdlovu laye owayelamanxeba okugwazwa efile.
Ngesikhathi intatheli zifika kule indawo, izakhamizi bezilokhu zisatshaqeke umzimba ngesehlakalo lesi.
Kuvele ukuba omunye wahle wafela lapho agwazwa khona kuthi omunye udlule emhlabeni esesesibhedlela seMpilo lapho afika kwathiwa usedlule emhlabeni.
Izakhamizi bezime amadlodlongwana zilandiselana ngesehlakalo lesi esenzakale phakathi kwamabili duzane lemizi yazo.
“Kulegazi phandle kwendawo yokukhipha imali njalo kulezitina ezimbili ezingabe zisetshenziswe ekuhlaseleni ngoba zilegazi,” kutsho isakhamuzi, uMnu Enock Mpofu.
Uthe uzwe umsindo phandle kwe-nightclub ngehola lika-02:00 kodwa akazange akucabange kangako ngoba abantu abadakiweyo bevame ukuba lomkhuba wokulwa phandle kwe-nightclub izikhathi ezinengi.
Amapholisa athole isidumbu somunye umfana bucwadlana lapho okunakanelwa ukuthi engabe eqalekile wawa ngemva kokuhlaselwa.
“Indawo le ithandwa njalo ngamakorokoza ngaleso sizatho ukulwa kuvamile,” kutsho uMnu Mpofu.
UMnuzana Tapiwanashe Mapfumo, onguye okhangele indawo le uthe, ividiyo ethethwe ngama-camera aphandle iveza enye indoda ihlaselwa ngamadoda amanengi.
“Ngizwe kuthiwa omunye wamadoda la ufele esibhedlela seMpilo, ngemva kokugijinyiselwa esibhedlela ngabangane. Isidumbu senye indoda sithethwe ngamapholisa ekuseni bucwadlana lathi.
“Kuvidiyo le kukhanya iqembu lixabana andubana omunye wabo awele phansi. Sitshiya konke ezandleni zamapholisa ukuze achwayisise,” kutsho uMnu Mupfumo.
