admin
Nkosilathi Sibanda
UKUNQOBA kwamaMighty Warriors kumidlalo yomkhankaso wenkezo ye-Africa Women Cup of Nations (AWCN) kuveza ukuzimisela kwabadlali lomqeqetshi, kutsho abalandeli labacubunguli bomdlalo.
Ubafake kuhle abadlali bakhe uSithethelelwe “Kwinji 15” Sibanda nanko amaMighty Warriors aseseduzane lokuyancintisa kumqhudelwano we2022 Africa Women Cup of Nations (AWCON).
Umqeqetshi lo wenelise ukulolonga abadlali beZimbabwe ngesikhathi esifitshane, bafika banqoba iqembu leSwatini nge 3-0 kumdlalo oqhutshwe ngoLwesibili edolobheni leManzini.
Ukunqoba lokhu kutsho ukuba amaMighty Warriors abuthelele amabhola ayisithupha egedini leSwatini nanko kumdlalo wakuqala owawusenkundleni yeNational Sports Stadium anqoba nge 3-1.
Ubebukhali umgadli uMarjory Nyaumwe ovule igedi ngomvema webhola elidojwe ngunozinti weSwatini seliphakathi. Kulandela uMaudy Mafuruse ohlohle amabili ngemva kwekhefu. Umgadli uShyline Dambamuromo uqedise ngebhola umdlalo usubanga emaphethelweni.
Isazi kwezenguqu kulumhlubulo welizwe uNkosiyazi Sithole, ongumqeqetshi weyinye yamakolitshi enguqu eMatabeleland North uthe ukuqhuba kakuhle kwamaMighty Warriors kube yisibonelo kuqembu labafana ukuthi ibhola lidlalwa njani kumabanga aphezulu. “Omama sebengcono kumdlalo wenguqu. Nxa iqembu lamaWarriors lidliwa kodwa elamaMighty Warriors linqoba, kutsho phela ukuthi omama bayazi into abayenzayo.”
UNelson Ndeka umqondisi wenguqu kuPonel Youth Soccer Academy uthe akulasizatho sokukhalaza eqenjini lamaWarriors.
“Loba kungamelanga siqathanise kangako, kuyavela ukuthi amaMighty Warriors alolonge, alungiselela imidlalo yawo kungela sekelo olufana loluphiwa amaWarriors. Ukuzimisela nje ukuthi umuntu afeze iphupho lakhe kumqoka
“Sibatshayela ihlombe ngokufikisa ibanga leli, silethemba lokuthi iZimbabwe izafika kumidlalo yokucina yomkhankaso we-Africa Women Cup of Nations.”
Iphephandaba likazulu lixhumane lomqeqetshi uKwinji 15 ebulenjini obike ukuba usekhangelele ukuthi aqinise abadlali ehlose ukubhaxabula kolandelayo.
“Siphutshe lelibanga kalula kodwa kungenxa yokuzimisela kwethu kusikhathi esifitshane ebesilaso,” kutsho lumqeqetshi.
Loba bekulabadlali abathenjiweyo, abathile abalimeleyo, umqeqetshi lo utshengisele ukuthi uyazi ukutshintsha umdlalo asebenzise lonke ithalenta alalo. IZimbabwe ilindele ukuthi idibane lesizwe esizanqoba phakathi kweAngola le-Botswana.
Online Reporter