Online Reporter
USELE lemibuzo engelazimpendulo umdeni wowesilisa wakoSithebe, eMandeni, owanyamalala ngoMpalakazi 2023, ongcwatshwe esengamathambo ngempelasonto.
Amathambo kaMnumzana Siya Makhoba, owayeleminyaka engu-39 ngesikhathi ebhubha acine engcwatshwa ngumndeni ngoMgqibelo, kulandela ukubuya kwemiphumela yolibofuzo (DNA) eqinisekisa ukuthi nguye ngempela.
Umfowabo kamufi, uMnumzana Khobs Makhoba elandisa ngesehlakalo lesi uthe kwakunguLwezi 2023, ngesikhathi omunye wabaholi bomphakathi emhudula ngemota, emsola ngokuthi webe uthayela wakhe.
Uthe ngemva kwesehlakalo, lumholi wabuye wathola ulwazi lokuthi uthayela awuthathwanga ngumufi, wazivumela phambi komdeni, waxolisa wase ethembisa ukuthi uzomnxephezela ngemali umufi ngokumlimazela into angayazi.
“Akuhambanga kahle ngesivumelwano sabo njengoba bacina sebephikisana ngesamba semali eyisinxephezelo.
Omunye lomunye wacina edonsa ebheka le, umfowethu ethi usezoqhubeka lecala lokuhudulwa kwakhe enkantolo, lalumholi wathi kulungile kenze njalo,” kutsho uMakhoba.
Uthe umdeni wawusalinde ukuthi kuqhubeke icala enkantolo ngesikhathi umufi evele enyamalala ngoMpalakazi womnyaka ofanayo. Udalule ukuthi lu mholi wayegqigqa icala lokutshaya ngenhloso yokulimaza lelokuzama ukubulala enkantolo. Uveze lokuthi umfowabo wayengayi enkantolo eyothamela icala banganaka ukuthi yingoba edukile.
“Saqala sanganaki lutho sizitshela ukuthi uzihambele izindlela zakhe njengoba engumuntu wesilisa. Kuthe uma kusiba Ngunhlolanja ka-2024, kwacaca ukuthi kukhona okutshaya amanzi ngokuduka kwakhe, umdeni wabikela amapholisa,” kutsho uMakhoba.
Uthe kwakungu-Mabasa 2024, ngesikhathi kutholwa amathambo okwakusolwa ukuthi akamfowabo, idokethi lokuduka komuntu laphendulwa laba ngelokufa komuntu.
“Amathambo ayekhombisa ukuthi utshisiwe, ekhanda elezindawo elezibazi ezivulekileyo, kwaphinde kwaba lembobo ekhombisa ukuthi udutshuliwe,” utsho kanje.
Uthe bebelokhu belinde imiphumela eze yabuya kuyo kulinyanga maqede kwenzeka isixakaxaka, uhulumende ewangcwaba amathambo akhe, ewaphambanisa lawomunye umuntu ongaziwayo, ayelokhu ehleli kusukela ngo-2020.
“Simngcwabe ngoMgqibelo, ngemva kokuba amathambo akhe angcwatshwa nguhulumende ewaphambanisa lamanye, ambiwe ngoLwesine lapho abesengcwatshwe khona (uhulumende),” kutsho uMakhoba.
Uthe basabufuna ubulungiswa ngokufa kwakhe kodwa abazi bafuna izimpendulo abangazi bazozithatha ngaphi.
“Kukhona abomphakathi abathi asingabuki kude kodwa sibuke kulabo abebelenkinga lomufi. “
Imizamo yokuthola ukuphawula kwamapholisa ayiphumelelanga njengoba engazange ayiphendule imibuzo athunyelwe yona. -Isolezwe
