Online Reporter
Muchaneta Chimuka
MURUME wekuChitungwiza wekushungurudza hanzvadzi yake pamwe nekutyisidzira nerufu achiti anotomuona segonzo raanogona kuuraya nyore akapihwa chirango chekugara mujeri kwemwedzi minomwe izere.
Given Parehwa (25) wekuZengeza 4 akadhonzerwa pamberi pedare reChitungwiza Magistrates’ Court nemhosva yemhirizhonga uye kutyisidzira hanzvadzi yake, Talent Parehwa (35), pamwe chete nemhuri yake nerufu.
Given aigara pamba pamwe chete nehanzvadzi yake pakaitika botso iri.
Akatongwa pasi pechikamu chemutemo weSection 3(1)(a) of the Domestic Violence Act Chapter 05:06 Intimidation
Muchuchisi Passmore Rulenso vakaudza dare kuti nomusi wa8 Chivabvu gore rino munguva dzemanheru, Given akangotanga kupopota achiti anoda kuuraya hazvadzi yake, Talent, pamwe nevana vake.
“Akangotanga kupopota tisina chatamutadzira, akatoti akatitarisa (kureva ini nevana vangu) ari kutotiona semakonzo ayo anogona kutouraya zviri nyore zvakaita kuti timumhan’arire kumapurisa,” anodaro Talent achiudza dare.
Zvisinei nekuti Given akamboedza kuvhika mhosva iyi achiti haana kutukirira kana kuvimbisa rufu kuhanzvadzi yake nevana, mutongi Karen Jeffery vakamubata nemhosva.
