Online Reporter
Sikhulekelani Moyo
IConfederation of Zimbabwe Retailers (CZR) yamukele, yancoma iKhabhinethi yakuleli ngesinqumo sayo sokwehlisa imithelo ethile, ibika ukuba lokhu kuzaletha ingqubekela phambili, kusekele ukukhula kwamabhizimusi kuzo zonke ingatsha.
Inhlanganiso le ithe inyathelo leli lihambelana lokuzimisela kukaHulumende ekuthini kube lendlela engcono ekhulula ukuqhutshwa kwamabhizimusi, njengokuphawulwa yiVision 2030.
“Kuyancomeka ukuthi uHulumende usegcwalisise inyathelo likamhlaka 29 Ntulikazi 2025, elokukhulula ukuqhutshwa kwamabhizimusi kungatsha ezilitshumi lambili kumkhonomi welizwe.
Lokhu kutshengisela ukuzimisela kwenkokheli zepolitiki ukukhipha konke okuvimba ukukhula kwamabhizimusi,” kutsho umongameli weCZR uDokotela Denford Mutashu.
“Kuminyaka edluleyo bekulamachence lemithelo eminengi ebibhadalelwa, ivela kungatsha ezitshiyeneyo lakumakhansili, obekubuyelisa umkhonomi emuva.
“Ngemizamo yokukhulisa amabhizimusi, iKhabhinethi ivumele ukumanyaniswa kwamachence lemithelo, okuzadala ukuthi kuqhutshwe kakuhle amabhizimusi.”
UDkt Mutashu uthe inhlanganiso yeCZR izahlala isekela uHulumende kulokho.
“Sibonga uMongameli Mnangagwa lequla leKhabhinethi ngokuzimisela ukusekela amabhizimusi ukwenzela ukuthi kungabi lomuntu kumbe indawo esalela emuva
“Sicela zonke ingatsha lamakhansili ukuthi alandele osekubekiwe ngamachence lemithelo. Njenge CZR sizasekela wonke amanyathelo kaHulumende.”
