Online Reporter
Lovemore Dube
KULABADLALI abaphenduka empini yokukhulula ilizwe ngo1980, bafika babazitshantshu kwezemidlalo.
Bakhalala amathuba ababelawo empilweni bazimisela ukuyalwela inkululeko. Bahamba bengazi lokuthi bazaphenduka bephila.
UJerry Chidawa, Droment Chirova, Smart Moyo, George Moyo loCharles Ndebele ngabanye balabo ababazintshantshu ilizwe selithole uzibuse.
Ekuphendukeni kwabo ngo1980 baqala badlala okokuzilibazisa enkambeni zamabutho abafikela kuzo.
UChidawa wayeseMozambique esilwa ekuhlangothi lweZanla loChirova.
Ekuphendukeni kwabo babaphakathi kwabadlali abadojwayo ngo1982 sekube lesinqumo sokuthi kubunjwe iqembu lenguqu kuZimbabwe National Army. Iqembu leli kwabayi Black Rhinos.
Lalavuka okomlilo, lathatha isicoco seNorthern Region Division One ngo1983, lazothatha kubanga le-Super League, osekuyi-Premier Soccer League khathesi.
UChirova kazange abelodumo olungako njengomdlali kodwa uvele emehlweni kazulu esengumqeqetshi, wabuya wayaphathisa njalo kuBlack Rhinos.
UChidawa waziwa njengomuntu owayele mbabazane phambili kwegedi. Wahlohla njalonje ebalwela kuboMaronga Nyangela, Shaky Tauro, George Rollo, Bethal Salis, Charles Chirwa, Rahman Gumbo, Choddy Chirwa, Labani Ngoma, Tobias Mudyambanje, Thomas Mudzengerere kulabo ababesaziwa ngokuhlohla.
Esedibene laboStanley Ndunduma, Stix Mtizwa, Hamid Dhana, Jimmy Mbewe laboLandton Mutimba, wayengabambeki encintisana loMaronga Nyangela phambili kuBlack Rhinos.
OMoyo bobabili babengonozinti beHighlanders bengachaphi. UGeorge wayesukume phansi ngemva kokusuka kukaBruce Grobbelaar ngo1975 wasala encintisana lo-Ananias “Nana” Dube kukanti uSmart laye wayelandela.
Bobabili onozinti laba bakhetha ukuyakhulula ilizwe njalo ekuphendukeni kwabo baqhubekela phambili ngomdlalo webhola lenyawo. Bobabili babangabanye abakhetha ukungangeni kuZimbabwe National Army.
Bona babekuhlangothi lwamabutho eZipra empini.
UGeorge wake wabangumsekeli kaPeter Nkomo unozinti omkhulu, owaye lendumela kuBosso.
LoSmart wadlala kuboDivision One wazophathisa lakuHighlanders.
OkaNdebele, imbali yeBlack Rhinos iyabe ingaphelelanga nxa engabaliswa kuyo.
Babemdobhe besithi uzadlala phakathi engomunye wabayi-40 abakuqala laboJerry Chidawa.
Umqeqetshi weBlack Rhinos uSherperd Murape, owayedlalele iDynamos leqembu lelizwe wabona okunye abanye ababengakaze bakubone kuNdebele.
UMurape wamenza unozinti embone esenza kuhle.
Waba ngunozinti wokuqala kuqembu lamasotsha, wazohlaliswa phansi nguJaphet Mparutsa.
Bambalwa labanye abadlala kumaqembu aphansi kodwa laba yibo abaziwayo, abaphenduka benza kuhle bengabadlali benguqu.
