Online Reporter
Ethel Ncube
LIGWETSHWE ukuyapika ejele okweminyaka engu-62 isela leZaka eMasvingo eladubula labulala amapholisa amabili kanye lokudala amanye amacala okutshontsha.
UDaniel Munyanyi wesiqintini seNdume ngaphansi kweNduna uNdanga eZaka umiswe phambi komthethwandaba weMasvingo wagwetshwa iminyaka engu-62 ngempelaviki. UMunyanyi uvele phambi kukamantshi u-Innocent Bepura ebhekane njalo lamacala ayisithupha okutshontsha. Utholakale elecala kuwo wonke wahle wagwetshwa masinyane.
Uthole iminyaka engu-12 kulinye ngalinye icala, kwathi iminyaka engu-10 yesigwebo yakhutshwa. Umantshi uBepura uthe amacala la enziwa ngendlela elodlakela ngoba umsolwa wasebenzisa umbhobho.
Umthethwandaba uzwe ukuthi uMunyanyi labanye bakhe batshontsha imali, izimota, omakhalekhukhwini lezinye impahla eziligugu, okunengi kwakho okungazange kutholakale.
Umtshutshisi uInnocent Mudzingwa uveze ukuba uMunyanyi wenze lobubugebengu bokutshontsha obunzima ngodlakela.
“Umsolwa wagqekeza wangena ezindlini zabantu, okuyizindawo okufanele zibe zindawo eziphephileyo. Wathatha impahla, esebenzisa udlame waphinda wathatha imali lempahla yalabo abangomamangala abazisebenzele nzima,” kutsho uMudzingwa.
Umthethwandaba utshelwe ukuthi inengi labantu abatshontshelwayo ngosomabhizimusi abaphila ngemisebenzi yabo, impahla yabo eyebiwayo ibalulekile empilweni.
“Ezinye impahla azikatholakali njalo, kanti lomsolwa kazange azinikele emapholiseni kodwa wabotshwa esesenza amanye amacala,” kutsho uMudzingwa.
Ukutshontsha lokhu kwenzakala phakathi kukaNhlangula 2025 loNhlolanja 2026 eZaka, Bikita leGutu, lapho uMunyanyi labanye abangane bakhe ababalekayo behlasela izindlu lezitolo ebusuku bephethe imibhobho lamabhemba.
Kwesinye isehlakalo, leliqembu lathatha imali eZaka engange US$10 000 ngemva kokubopha umuntu lemuli yakhe ngentambo zezicathulo, bebethusela ngokubabulala. Kwezinye izehlakalo, leliqembu leba izimota ezigoqela Toyota Porte, Toyota Mark X le Honda Fit Hybrid, kanye lemali, ukudla, ama-airtime labomakhalekhukhwini.
“UMunyanyi wabotshwa mhlaka 2 Mbimbitho 2026 eNyika Growth Point ephethe umbhobho, lapho avuma khona ukuthi nguye owenze la macala.
“Amapholisa athola ezinye zezimota kanye lesibhamu sohlobo lwe-Star 9mm, kodwa inengi lempahla eyebiwayo ayizange itholakale.
Umsolwa kwesinye isehlakalo sokutshontsha wadubula kabili esethusela abantu ababemlandela ngesikhathi ebaleka endlini yakhe eGutu,” kutsho uMudzingwa
UMantshi uBepura uthe uMunyanyi utshengise ukuthi uyingozi njalo kumele asuswe emphakathini uzahlala ejele okwenyaka engu-62.
