Online Reporter
Lovemore Dube
UPIETER De Jongh obengumqeqetshi weHighlanders uthe owakhe umsebenzi wawufeza njalo ubekhangelele ukuba khona kumnyaka ozayo.
UDe Jongh ophathise iHighlanders ukuthi ingatshoni iyedlala kuDivision One, usebuyele eKenya lapho ahlala khona, eqhuba amabhizimusi akhe.
Ekhuluma leZimpapers Sports Hub kuliviki, uDe Jongh uthe ngomsebenzi awenzayo wayekhangelele ukuthi uzaphiwa ithuba lokuthi asebenze isikhathi eside, ayibumbe iHighlanders yenelise ukuncintisana lezinye.
Kodwa abaqhatshi bakhe abazange basuthiseke ngendlela asebenza ngayo, bakhetha ukuthi behlukane laye.
Uthe eqala ngenyanga kaNcwabakazi, waphiwa umsebenzi wokuthi abone ukuba iqembu leHighlanders kaliyi kuDivision One.
“Ngaqhatshwa ngaqonqoselwa ukuthi iHighlanders ingatshoni. Ayitshonanga langempela. Usuphelile umnyaka bengilethemba lokuthi ngizaphiwa ithuba lokuthi ngiyibumbe iHighlanders abazayikhwabitha njalo besengibone abadlali abambalwa ebingithi singabathola kuzabamnandi,” kutsho uDe Jongh.
UDe Jongh ukewaba leHighlanders ngo2019. Waqhatshwa okwesikhathi esifitshane okufana lokwalonyaka, wenelisa ukuthi iHighlanders igcine isihlalo sayo kuPremier Soccer League.
Ngalowomnyaka iHighlanders yadla iNgezi Platinum ithatha inkezo yeChibuku Super Cup.
Lonyaka iHighlanders ifike kwezine ezokucina (semi-final) lapho eyadliwa ngabombekwa yiDynamos.
UNqobizitha Masuku oweTelOne loLawrence Mhlanga oweManica Diamonds bebengabanye akade ekhangelele ukuthi baze kuHighlanders kumnyaka ozayo.
“Bengizathatha abane abeMalawi ngenze iHighlanders iqembu abazalikhwabitha.
UDe Jongh uthi ekuphendukeni kwakhe lonyaka uthole kulokunxele okunengi.
“Ngithole abafana bengasaziphathi kuhle, njalo ubungeke watsho ukuthi bebevukela enkundleni besiyalolongwa. Okunye obekusinda yikuthi baphakamise amakhanda badlale bezimisele ngoba iqembu lilezikwelede zabosigning on fee,” watsho uDe Jongh.
Ingqobe yakhe yokuqala yabayikuzama ukuthi asebenze imikhumbulo yabo ngokufaka okungabajabulisa. Ubethi banganqoba abanike imali engangeUS$1 000.
“Bekunzima laphana kodwa sasebenzisana kuhle labafana labasekeli bami ngaphandle kololonga onozinti obebuyangesikhathi sakhe, uTembo Chuma.”
