Online ReporterUNOZINTI weBafana Bafana, uRicardo Goss, uthe iqembu labo kumele lithathe okunengi kuzifundo elizithole ku-Africa Cup of Nations (Afcon) eMorocco njengoba lihlose ukulungisa amaphutha alo ngaphambi kokuba liyedlala kunkezo yomhlaba.
IBafana Bafana ibuyele kubo ngoLwesithathu, lapho eyamukelwe khona egcekeni lendizamtshina ele-OR Tambo International, eGoli, ngumphathintambo wezemidlalo uGayton McKenzie lehlekana labalandeli.
IBafana Bafana ikhitshwe ikusigaba seLast 16 kulumqhudelwano.
Yanqotshwa yiCameroon nge 2-1.
Ekhuluma leSABC, uGoss uvumile ukuthi kubadumazile ukuphangisa ukuphuma.
“Kunzima. Nxa uqathanisa imidlalo ye-Afcon le, kusobala ukuthi abadlali abazizwa kuhle. Ukudana kubhalwe ebusweni. Besilindele okukhulu,” kutsho umdlali lo.
“Amanye amaqembu asihlaziye kakuhle. Sibonile sidlala le-Egypt ukuthi ibihlezi emuva, okutsho ukuthi kukhona okuhle esikwenzileyo. Besileqembu elihle kodwa kumele siqinise ekubhidlizeni igedi, sihlohle.
“Emdlalweni leCameroon bekumele ngabe sihambe phambili ngamabhola amathathu emizuzwini engu-20 yokuvula umdlalo. Kwesinye isikhathi kuhamba ngenhlanhla. Ukube siwasebenzisile amathuba esiwathole sidlala leCameroon ngabe sonke sijabulile. Kuyingxenye yezifundo esizifundileyo njalo kumele siqhubekele phambili. Abalandeli kumele baqhubeke ngokusisekela. Ngicabanga ukuthi kukhona okuhle okuzayo.”
UGoss ngomunye unozinti, uSipho Chaine, abangadlalalanga eMorocco njengoba ukaputeni, uRonwen Wiliams, eyiqale wayiqeda yomine imidlalo.
IBafana Bafana izadlala imidlalo yobungane ngoMbimbitho njengengxenye yamalungiselelo enkezo yomhlaba ezaqala ngoNhlangula eMexico, Canada laseMelika.
