Online Reporter
Bongani Ndlovu
KULEsizalwane seZimbabwe esibotshwe ngamapholisa eSouth Africa ngemva kokutholakala silamaphasipoti angu-582 lemali edlula iR147 000, akade kufihlwe emoteni.
Kucatshengelwa ukuthi indoda le, eleminyaka yokuzalwa engu-42, ingabe iphakathi kobugebengu bokweqisa abantu emingceleni okungekho emthethweni.
Ukubotshwa kwayo kuqinisekiswe yiSouth African Police Service (SAPS), ebike ukuba ekubotshweni kwalindoda bekubambene oMiddelburg Flying Squad, Nkangala District Anti-Hijacking Team lamapholisa eWaterval Boven.
Kumbiko weSAPS enkundleni zokuxhumana, amapholisa abike ukuba athole udletshana lokuthi kulemota yohlobo lweChevrolet Utility emhlophe elenombolo zeGauteng okucatshangelwa ukuthi ithwele incwadi ezingekho emthethweni.
“Imota imiswe mhlaka 8 Mpalakazi ngehola lakuqala emini. Kwenziwe uphenyo, yakhangelisiswa kwatholakala okumangalise amapholisa. Athole amaphasipoti angu-582, amanye efakwe imali phakathi efihliwe. Bekule R20 000 phakathi kwepulasitiki. Sekuhlangene, umsolwa utholakale ele-R147 300,” kutsho iSAPS.
Kumifanekiso ebekwe yiSAPS, kutholakale amaphasipoti akuleli amanengi, amanye engaweMalawi leMozambique.
Amapholisa athe akholwa ukuthi amaphasipoti la ebehanjiswa ukuyadindiswa, okungumkhuba ojwayelekileyo kulabo abafuna ukwengeza amalanga behlala eSouth Africa.
“Sicabangela ukuthi umtshayeli lo ubeqonde ukuyahlangana lomunye asebenza laye, obezadinda amaphasipoti la ebesebhadalwa.
“Isizalwane seZimbabwe lesi sesigaxwe icala lokwephula umthetho weSouth African Immigration Act lokukhwabanisa. Imota yakhe ibanjiwe kusaqhutshwa uphenyo,” yiSAPS le.
Umsolwa ubekhangelelwe ukumiswa emthethwandaba weWaterval Boven Periodical Court ngoLwesithathu.
Amapholisa athe uphenyo luyaqhubeka njalo bacabangela ukuthi kuzabotshwa abantu abanengi.
