adminTatenda Shuro
MUMWE murume akachema-chema pamberi pedare achiti aimbove mudzimai wake ane katsika kekumushungurudza uye rimwe zuva akambouya kubasa kwake akamuzvuzvurudza akamudzvanya chikabudura ndokusiya amubvarurira juzi rake.
Leeward Chakubva akamhan’arira Annalyn Gangayi kuHarare Civil Court.
“Mambo wangu, uyu aimbove mudzimai wangu uye tine vana vaviri tose. Zvino ane tsika yekuuya kubasa kwangu achindishaisa rugare.
“Musi wa1 Chikumi akauya akandizvuzvurudza akandibata chikadabura changu akabvarura juzi rangu ndokundiudza kuti handisi kuzogara murugare nemukadzi wangu wandava naye,” anodaro Chakubva.
Anoenderera mberi achiti, “Amai ava vane kahunhu kasingaite zvachose kekuti vakangondiona pavanhu bedzi, vanondishungurudza vachitaura zvakaipa pamusoro pangu.”
Achipawo diki rake, Gangayi anoti Chakubva ndiye anotomushungurudza.
“Ndinopokana nechikumbiro chake nokuti handina kumudhonza pandakaenda kubasa kwake, asi kuti ndiye akatondirova ndikanomhan’ara kumapurisa uye akaputsa runhare rwangu,” anodaro.
Mutongi Nyasha Marufu akapa Chakubva gwaro redziviriro.
Online Reporter