Online Reporter
Nkosilathi Sibanda eseNkayi
ABANTU beNkayi sebebike ukuba ngeke bedlulwa ngezinye izigaba kwezemidlalo ngakho sebezaqina ngokusekela ithalenta labasakhulayo kwezemidlalo ukuze isigaba siphakame.
Lokhu kubonakale ngesikhathi kuqhutshwa imidlalo yenguqu kumqhudelwano weNkayi Youth Football Tournament enkundleni zesikolo seNkayi High ngempelaviki edluleyo.
Bekudibene amaqembu ama-Under-17 lama Under-15 agoqela iNkayi Soccer Academy, Highlanders, Somvubu Academy, Lupane City FC, Corinthias SOE leSuper Eagles. Kuhlandla lamankazana bekuleSibanye, Nkayi Soccer Academy, Amazwangendaba Royal Queens, Lupane City, Somvunbu Academy leCorinthias SOE.
Kunqobe iqembu leHighlanders kuma-U17 abafana, litshaya iNkayi Soccer Academy 2-0.
Kuhlandla lamankazana intshantshu kube yiSibanye FC ilandelwa yiSomvubu kunombolo yesithathu kwaba yiNkayi Soccer Academy.
Amankazana athole isicoco nguKimberly Ncube obengumgadli odlale ukwedlula bonke. Umdlali ohambe phambili nguMichel Gwebu.
Omunye wabaqoqi bomncintiswano uBigboy “Mjimba” Moyo utshele iphephandaba likazulu ukuthi inhloso ephambili ngalumncintiswano bekuyikukhulisa abantwana abalethalenta kwezemidlalo, ukwenzela ukuthi babengumzekeliso kwabanye.
“Lapha sithi phakama Nkayi njengesigaba. Siphakamisa intsha yakulindawo ukuthi izimele, itshengisa ukuba eNkayi kulethalenta kunguqu. Lokhu kuzakuba ngumzekeliso kwabanye ontanga.
“Kuyaziwa ukuthi ithalenta emaphandleni kwezemidlalo kaliboniswa. Thina sizimisele ukuthi sinike abantwabethu ithuba lokubonisa ithalenta labo kuNkayi Football Tournament.”
Umdlalo wenguqu esigabeni seNkayi usukhule wafika kusigaba sokuthi sebebanengi asebelandela amaqembu aphuma kulindawo, agoqela iNkayi United edlala kuZifa Division One.
