Phathani kuhle obabhemi

Johas Moyo
INHLANGANISO ebona ngezempilakahle yezifuyo esabelweni seMatabeleland isiveze ukuthi abalimi kumele baphathe kuhle obabhemi nanko phela sokuvele ukuba inengi labalimi lilima ngabo.

Ukuphatha kuhle obabhemi kuzabaphathisa njalo ukuthi babe lempilakahle njengoba isikhathi sokulima sesisondele.
Ekhuluma loMthunywa uMnumzana Mike Nemashakwe onguLivestock Production Officer esabelweni seMatabeleland North ukhuthaze abalimi bonke jikelele ukuthi baphathe kuhle izifuyo ikakhulu obabhemi.

“Njengenhlanganiso sikhuthaza abalimi ukuthi banakekele kuhle obabhemi ukuze bangacubi ngoba sesifikile isikhathi lapho abadingakala khona kakhulu.

“Kuvamile ukuthi abantu kabaphathi kuhle obabhemi kodwa yibo abalima ngabo,” kutsho uMnu Nemashakwe.

Uqhubekele phambili exwayisa abalimi ukuthi bekele ukubahlukuluza ngoba abanye bacina begula kukanti abanye bacina besiba yizilima.

“Sixwayisa abalimi ukuthi bengatshayi obabhemi ngezinto ezilimazayo ngoba izilonda zabo ziyaphuza ukuphola.

Kubanzima-ke ukuthi basebenze nxa begula okwenza lomlimi laye ehluleke ukulima indawo enkulu ngenxa yalokhu.

“Abalimi abananzelele ukuthi indlela abaphatha ngayo izifuyo zabo yenza babe lenzuzo kumbe bangabi layo,” kutsho uMnu Nemashakwe.

Uqhubekele phambili uMnu Nemashakwe ekhuthaza abalimi ukuthi baphumuze izifuyo zabo njalo baziphe amanzi ngoba kuyatshisa.

“Ukuthi obabhemi batshone bengadlanga akuqondanga njalo kumele bathole amanzi baphinde baphumule, bangahlali besebenza nzima izikhathi zonke.

“Nxa lokhu kungenziwanga obabhemi bayaswela amandla okudonsa ikhuba nxa kulinywa,” kutsho uMnu Nemashakwe.

Uphethe ngokukhuthaza abalimi ukuthi nxa obabhemi babo bangaba lezilonda babadingele imithi yokuzelapha kumbe babone odokotela bezinyamazana.