admin
Ngesikhathi somqando kwejayelekile ukuthi abantu badle ukudla okulomhluzi omnengi ukuze bakhudumale. Kanti ngokunjalo umhluzi umnandi njalo yisitshebo sesitshwala, irayisi, amagwili, amatshakada lesinkwa.
Kulemihluzi eminengi eyenziwa ngokwehlukana. Ingaba khona eyenziwa ngendlela ezehlukeneyo, eyenkomo, imbuzi, imvu, inkukhu lenyamazana.
Kubekhona njalo eyenziwa ngemibhida eyehlukeneyo. Ekwenzeni imihluzi kufanele ubelomhluzi okuthiwa yi-broth njalo kulezi insuku zalamuhla ungaba lephakethi lempuphu yomhluzi (soup powder) layo impuphu yomhluzi yehlukene.
Yona-ke ithengwa ezitolo. Okuqakathekileyo yikuthi uhlale ulomhluzi olula okuthiwa yi-stock. Lamuhla ngizalitshela ngokwenziwa kwe-stock ezimbili, esenyama lesemibhida.
Zihluphe uhlale ulazo lezi izi-stock ngoba awuzukuswela isitshebo lanini usufikelwa ngabantu bemzini. Hlala ulindile ube ngumama ohlakaniphileyo hatshi odidizela nje abambe lapha lalapha acine esithi akulasitshebo.
I-stock senyama
Okudingakalayo
1. Amathambo enyama loba yiphi amangqina loba imbambo
2. Isawudo, imbodlela
3. Imbiza yokuphekela
4. Umlilo kumbe isitofu
Ukupheka
1. Bilisa enye yalezi inyama engiziqambileyo okwesikhathi eside ngembiza enkulu.
2. Bona ukuthi ekuvuthweni kusala kulomhluzi omnengi.
3. Yephula imbiza eziko uyekele iphole umhluzi.
4. Nxa usupholile wuthele embodleleni uvale ubeke endaweni eqandayo (fridge).
NB — I-stock lesi sisebenza nxa kuphekwa imihluzi eyehlukeneyo.
I-stock semibhida
Okudingakalayo
1. Imibhida eyehlukeneyo, ingaba yitshomoliya, irephu, amakherothi, ikholifulawa, amagwili, isipinatshi lokunye
2. Isawudo, imbodlela lophini, umlilo, ifridge
Ukuphekwa
1. Gezisa imibhida ngokwehlukana kwayo.
2. Ipheke ngokwehlukana kwayo, isikhathi esingaba ngamahola amabili. Yekela ivuthwe kusale amanzi amanengi.
3. Yekela kuphole ubusuthela umhluzi wemibhida embhodleleni.
4. Faka imbodlela efirijini (fridge)
Nanzi izinto ongathi nxa usupheka ujiyise ngazo imihluzi lemibhida ifulawa, incezu zesinkwa ezivuthuziweyo.
Umhluzi wenyama yenkomo kumbe imibhida
1. Imbodlela ye-stock
2. Amatamatisi, ihanyanisi, ibilebile
Ukupheka
1. Khanzinga ihanyanisi ufake amatamatisi lefulawa.
2. Thela i-stock esisembodleleni esiqandayo silingane lokukhetha kwakho abantu abazakudla.
3. Yengeza amanzi uyekele kuxhwathe emlilweni olingeneyo.
4. Thela isawudo lebilebile.
Nxa sekuvuthiwe dlana lesitshwala, irayisi, amagwili, amatshakada njalo njalo.
Online Reporter