Online Reporter
KULEQEMBU leGoli elahlabela ingoma ethi, Mmawubheke sebexabene ngenxa yakho babetsho beqinisile, babekubonile.Ungakhangela empilweni bakhona abantu abajatshuliswa yikubona abanye bexabana, kungaba sezimulini, emsebenzini, ezigabeni esihlala kizo ngitsho lemabandleni ezinkonzo bakhona.
Umuntu wakhona utshelwa kumbe ezwe udaba kodwa akhethe ukulubhala kutsha aluguqule afake awakhe amazwi okuxabanisa athabe abe manzi te lapho esebophanise abantu imisila. Abesesima bucwadlana abukele inkunzi zigqubulana, lemisebenzini bakhona abantu abanjalo, ngike ngasebenza lomunye umama, kwakuhlala kungamadale wodwa sekubuzwana ukuthi uNakaZibani nguye umsunguli wendaba esibangele ukungazwani.
Wayethi nxa sebembuza bemthonisisa wayephika embe phansi aze akhale inyembezi, wawungamzwela uthi mhlawumbe bayamhlolela, ekhala ezempisi ngoba ngikhumbula njalo wake walandwa ngomama ayekhonza labo kungoMvulo ekuseni salamula amanina esefinqe lezigqoko befuna ukumbhaxabula kwezwakala elinye inina lisithi lesontweni yethu ungasalugxobi ngoba ethi unguSathani uqobo lwakhe.
Ngaleso sikhathi wayesenunubele okwenkukhu ejunywe yimbolisamahlanga ilibele ngokuqhwaya umuhlwa yanethwa.
Abanye kuze kutshe izitshebo bemile ethangweni beqamba amanga badideke amakhanda abantu. Lokhu kuvame ukwenziwa ngabosapho lukaEva, emadodeni kunganeno.
Lawe lapho okhona ungabi ngumahlanekela izindaba uxege abantu, ungezwa kusithi khuluma uyikhulume njengoba injalo, ungafaki amafutha lamatamatisi.
Ayixabene.
