Online Reporter
Kwakuthi nxa kungehla iyezi elimnyama, kudlule umzali wabantwana emhlabeni, sebesele bezintandane, izihlobo zifunge zigomele ukuthi zizakondla abantwana, kodwa ngokuya kwesikhathi zijike izinto zingasahambi njengokuthembisa kwabo, badle luklubhu bakubone okwabonwa yingidi ithwele ilahle.
Ngikhumbula omunye umdeni kusabelo sakithi kwathi mhlazana sibeka unina wabantwana onguye umzali owayesesele emhlabeni intandane lezi zontathu zathenjiswa ukuthi akulalutho oluzatshintsha impilo izaqhubeka ifanana lalapho abazali babo besaphila.
Mhlawumbe babekukhulunyiswa yikuthi babebona zidlana uboya esibayeni inkomo, njalo babetshiye lendlu edolobheni. Phela kwakufuyiwe lapha inkomo, amabhudumu, intenjane lamawasakazi.
Ngokuhamba kwesikhathi lombuyiso ungakenziwa waqala uyisemncane ukuzithengisa ethi uthengisela ukuthi athole imali yokubhadalela abantwana bomfowabo indleko zesikolo lokunye nje ababengakudinga njengoba babesesebafitshane. Imali yamaloja yendlini yedolobheni wayeyilanda ayikhukhuze yonke.
Waqala ukukhonjwa ngapha langapha eyidla imali, wayethi mhla ethengisile, athenge izinkwa ezimbili adobhe lokunye okubili kumbe okuthathu nje. Baqala ukuxabana lowangakwakhe ngoba wayethi nxa elemali ethengisile ahambe umthutha khaya abatshiye beyatha ngendlala aze ayovumbuluka engasela lutho, athi nxa ebuzwa ngunkosikazi wakhe ukuthi ukwenzelani adlondlobale avuke ukeketani olobhova ethi kakhonyelwa yisidwaba, ambhaxabule okumuntu otshaya iphimpi elingene esilugwini laginya amatsiyane.
Laye unkosikazi wakhona wayethi nxa esetshayiwe akhwitshizele ulaka lwakhe lokupholisa imvimvinya abhodlele phezu kwentandane noma zingelacala, phela basebesusiwe emzini kayise sebehlala koyisemncane ngoba besesebancane. Wazithengisa inkomo kwasala kungasela ngitsho leyomuthi, uthe lapho ingqondo yakhe isingenwa ngupongwe ukuthi athengise indlu yedolobheni kwangenela omalumabo bethi okungaqalwayo, inkomo ingamzala umuntu agaqe ngamadolo.
Banengi abantwana abazithola besesimeni esinje, mhla womngcwabo uthola beligugu bephathwa njengeqanda kodwa ngokuya kwesikhathi bangene phakathi kodubo olumangalisayo, izihlobo sezitshabalale njengamazolo esesaba insaba zelanga lebusika ngenyanga kaMpandula.
Ayixabene.
