Online Reporter
NGEVIKI ephelileyo ngihambele emangweni weBeitbridge ngisiyahlangabeza omunye umngane wami odudulwe kweleSouth Africa ngoba ubesithi kasela ngitsho isheleni lokuthi athenge noma kungaba yinalithi.
Ngabona indwendwe zabantu begadiswa amabhasi amanye esiya koBulawayo, amanye esiya eHarare amanye njalo esiya kwamanye amadolobho afanana laboMasvingo.
Inengi labantu laba ababeduduliwe babethi nxa bebuzwa zintatheli zindaba ukuthi bengabe bengatshiyanga ezinye impahla zabo emuva babhavuke ngazwi linye bethi batshiye izinto zabo ezinengi ikakhulu labo ababevela kubo Durban labo Cape Town.
Abanye bakhona babesithi bagadiswa amabhasi abacitha emngceleni weMusina kwathiwa impahla zizalandela ngamanye amabhasi kodwa phinde.
Ngabona abantu abanengi abathi bebuzwa kwakhanya ukuthi kudala bahamba eGoli njalo basebelahlekelene lemideni yabo, okuzakwenza kube nzima ukuthi umuntu onjalo nxa esehla ibhasi uyaqonda ngaphi. Banengi esesibazwile bemenyezelwa kumaphephandaba, emisakazweni lakubomakhalekhukhwini kudingwa izihlobo zabo.
Akulula ukuvumbulula umuntu owamcina emnyakeni engamatshumi amathathu. Abanye bagcinwe emabandleni ezinkonzo ezitshiyeneyo.
Ngithanda ukukhuthaza abantu ukuthi sizame ukupha okufanana lempahla lokudla sincedisana loHulumende lezinye ingatsha ezizimele zodwa ukwenzela ukuthi abafowethu laba abangakaxhumani lezihlobo zabo bathole ukuphathiseka ngoba lencwadi engcwele ekaMvelingqangi iyasikhuthaza njalo liyasivezela ukuthi sibusisiwe isandla esiphayo kulesamukelayo.
Asizameni ngamandla sibambane sibe nyanda yinye sincedise abafowethu singababopheli nhliziyo ngoba okubavelele beseNingizimu Africa bebengakulindelanga kubajumile ngoba lokhu kwaqala sakudlala sisathi kumbe nanko sekuze kwafika lapho akade singacabangeli khona ukuthi abantu abansundu bangaphathana ngaloluhlobo, ukuthi umuntu onsundu abone omunye sengathi ubona indlondlo elophaphe ekhanda okumele nje igongodwe kumbe ibiliselwe amanzi itshiswe.
Khona ungakukhangelisisa incwadi engcwele iyakufakaza ukuthi izizwe zizavukelana mhlawumbe yikho ukuphela kwakhona. Asiphathiseni abafowethu ngalokhu esilakho okuncane kuzenza umehluko omkhulu.
Ayixabene.
