Online Reporter
AMANYE amadoda athwele nzima ezindlini zawo okwengidi ithwele ilahle. Kuvamile ukuthi amadoda akhona ukuthi nxa bephakathi komphakathi uthole bephonguzimisamisa befuna ukutshaya esabo isicathulo sizwakale phetsheya kukaGwembe kodwa nxa kufika amakhosikazi abo bathula bathi zwi sengathi imilomo yabo ithungwe ngenalithi, bazifananele lenkukhu enethwe lizulu likaMpandula lona elilimukisa abalimi ukuthi isikhathi sokulima sesisondele.
Ngelinye ilanga nganxuswa ngomunye umngane wami engisondelane laye okwamagama ohlala kwelinye ilokitshi lakoBulawayo, enginxusela ukuthi sizothokozela ilanga lakhe lokuzalwa.
Ngavuka ngageza nganxiba izembatho zami ngacwebezela noma isintu awuziqakezeli kodwa lelo langa ngangivunule sekungani ngumuntu oya ephalamende.
Ngafika ngathola sokufike abanye abangane ababili sababane ikhosikazi lalapha lalingekho liphumile sithe siphakathi kokosa lokuphuza ugologo owehlobo lwengwebu, omunye ephaquza ugwayi njalo kukhala lengoma yeqembu leSouth Africa iSoul Brothers ethi, “Hamba ntombi bayokubona abalamehlo”.
Ukungabi khona konkosikazi kamngane wami mina ngakuthatha njengokuthi mhlawumbe wayephumile efuna ukuthi sitshaywe ngumoya singabangane kuphela kanti angibuzanga elangeni, sithe lokhe siphakathi kokujabula wathutsha unkosikazi wacitsha umsakazo amatafula wawagenqula akhangela phezulu kwachitheka yonke into eyayiphezulu imiganu eyayilenyama yenkukhu leyenkomo lamabhuruvosi kuphoswa ngefasitela uthe eqeda lapho waya emkulwini wadobha umphini watshaya ngalo umkakhe lwaze lwaqamuka.
Mina engangigqoke ibhulugwe elimhlophe laselithelwe ngensipho zotshwala. Lumama kwakungani yinja elokeketani eluma noma yizigodo kumbe insimbi saphumela phandle yena esephonguthi NaMadawu ungenwe yini ngasengitshela laba abanye ukuthi asiphumeni sihambe basale beqedelana, khonapho etshaya umkakhe ngophini
wayelokhu ephethe ethi udlalisa imali thina singelakudla.
Umngane wami wayesethule engasaphenduli mhlawumbe esazi ukuthi angaphendula uzasala enethwa lizulu lesiqotho, kwaba yikuphela kokujabulela ilanga lokuzalwa komngane wami.
Manengi amadoda abuswa ngabafazi uthole umuntu esephenduke isibotshwa esendlini. Umama lo, kwakumele alinde ukuthi sihambe basale sebesilwa, omakhelwane basebelunguze ngamafasitela ngoba okwakusenzakala lapha kwakungani yimpi yamaJuda lamaPalastina.
Ayixabene
