Online Reporter
BAZABHADLA ejele eside isikhathi abathandanayo abagwetshwe udilikajele leminyaka engu-30 ngaphezulu ngumthethwandaba weThekwini, ngoLwesihlanu, kulandela ukulahlwa licala lokuzama ukubulala ingane eleminyaka engu-10.
Lezi zithandani ezileminyaka engu-30 zeWelbedacht East, eThekwini, zilahlwe licala lokuzama ukubulala, elokunganaki ingane, elokuyesabisa kanjalo lelokuyihlukumeza.
Ngokutsho kokhulumela iNational Prosecuting Authority (NPA), uNkosikazi Natasha Ramkisson-Kara, umamamangala owayeleminyaka elitshumi ngo-2021, ngesikhathi kuqala ukuhlukunyezwa, ungudadewabo kamsolwa wesibili, ongunkosikazi kamsolwa wokuqala.
Inkundla izwe ukuthi ukuhlukunyezwa kwakhe kwaqala ngo-2021 kwaze kwaba u-2023. Itshelwe ukuthi umamangala waqala ukuhlala labasolwa kulandela ukutshona kukanina.
“Umamangala kuthiwa wayetshaywa ngamambodlela otshwala aze aphihlikele kuye futhi egwazwa izikhawu ezinengi. Kwesinye isehlakalo watshaywa ngesando, induku kanjalo lempintshisi,” kutsho uNkkz Ramkisson-Kara.
Uqhubekele phambili wathi kokunye wayebuye abotshwe ngezintambo atshiswe ngamanzi abilayo, aphinde ancitshwe lokudla. Wathi umamamangala kwakuphoqa ukuthi akutshontshe ukudla ukuze akwazi ukuphila okuyinto eyayiholela ekutheni ahlukunyezwe kakhulu kulakuqala.
“Lokhu kwaholela ekutheni alahlekelwe ngamazinyo lenwele. Wayephinde aphoqwe ukuthi angayi esikolo, umsolwa wesibili, emkhiyela ukuqinisekisa ukuthi uhlala esendlini, kayi esikolo,” kutsho uRamkisson-Kara.
Uthe kwesinye isiwombe, umsolwa wesibili wayephoqa umgilwa ukuthi azibandakanye ezenzweni zocansi, lokuyisigameko esaqoshwa. UNkkz Ramkosson-Kara uthe kwesinye isehlakalo umsolwa wesibili wamthela ngophethroli umsolwa lezinye izihlobo ezimbili, ebasabisa ngokubabulala.
Uveze ukuthi umsolwa waze waphunyula ngokuthi eqe ngewindi lendlini yokugeza, wayocela usizo komakhelwane, wathi yilapho okwafonelwa khona amapholisa, umamangala wasiwa eThuthuzela yesibhedlela iRK Khan.
Uthe umtshushisi woMbuso, u-Advocate Cheryl Pillay, ngesikhathi ehola ofakazi abehlukene, okubalwa lalabo bokuhlolwa kwasesibhedlela, kwavela ukuthi umamangala ubekezelele ukuhlukunyezwa okwesikhathi eside futhi kumhlukumeze kakhulu emqondweni.
U-Adv Pillay efunda isitatimende sokuthi isimo simhlukumeze kangakanani umamangala, uveze ukuthi uhlukumezeke kakhulu ngenxa yabasolwa.
Uveze ukuthi ulezibazi umzimba wonke eziyohlala ziyisikhumbuzo sokuhlukunyezwa kwakhe, wathi lamanje usabhekana lobunzima bokungazithembi kanjalo lenkinga yokwehluleka ukulawula ukudinwa kwakhe.
Umsolwa wokuqala lowesibili banikwe udilikajele umuntu ngamunye ecaleni lokuzama ukubulala ingane.
Bagixabezwa ngelitshumi icala ngalinye kwelokungayinaki ingane, elokuhlukumeza lelokusabisa. Umsolwa wesibili uphinde wanikwa udilikajele kwelokuphoqa ingane ukuthi izibandakanye kwelokuzihlukumeza ngokocansi, elitshumi icala ngalinye kwamabili okuzama ukubulala izihlobo. Inkantolo iphinde yanquma ukuthi bangaphinde babe lemvumo yokuphatha isibhamu bese amagama abo efakwa ohlwini lwalabo abahlukumeza ngokocansi ezweni lonke.
UNkk Ramkisson-Kara uthe iNPA uyasamukela isigwebo, wathi kungalesi sizathu beqhubeka nokwandisa izikhungo ezingoThuthuzela ezweni lonke. Waveza ukuthi ngo-2021 zazingu-55 ezweni lonke, wathi njengamanje sezingu-66.
“Lezi zikhungo zilima enkulu indima ekuhlolweni kwabagilwa, banikwe usizo lokwelulekwa ngokomqondo bese belekelelwa ngosizo lwezomthetho. Lokhu kusiza kakhulu ekusizeni abagilwa abahlukunyezwe ngokocansi kuphinde kuqiniswe nezokushushiswa kwamacala alolu hlobo,” usho kanje. —Isolezwe
